ᱟᱵᱚ ᱫᱚ ᱥᱤᱧᱚᱛ ᱫᱤᱥᱚᱢ ᱨᱤᱱ ᱟᱹᱫᱤᱢ ᱠᱷᱮᱨᱣᱟᱲ ᱡᱟᱹᱛᱤ ᱨᱤᱱ ᱟᱹᱫᱤᱢ ᱡᱟᱹᱛᱤ ᱦᱚᱲ ᱠᱟᱱᱟ ᱵᱚᱱ᱾ ᱟᱵᱚᱣᱟᱜ ᱯᱟᱹᱨᱥᱤ ᱟᱲᱟᱝ ᱫᱚ ᱞᱤᱴᱟᱹ ᱴᱷᱟᱹᱠᱩᱨ ᱞᱟᱹᱭ ᱪᱮᱫ ᱟᱲᱟᱝ ᱠᱟᱱᱟ᱾ ᱟᱵᱚᱨᱤᱱ ᱯᱩᱭᱞᱩ ᱢᱟᱱᱶᱟ ᱯᱤᱞᱪᱩ ᱦᱟᱲᱟᱢ ᱟᱨ ᱯᱤᱞᱪᱩ ᱵᱩᱲᱦᱤ ᱫᱚ ᱞᱤᱴᱟᱹ ᱴᱷᱟᱠᱩᱨ ᱴᱷᱮᱱ ᱠᱷᱚᱱ ᱜᱮ ᱨᱚᱲ ᱞᱟᱸᱫᱟ, ᱫᱷᱚᱨᱚᱢ ᱠᱚᱨᱚᱢ, ᱥᱮᱵᱟ ᱥᱮᱨᱣᱟ, ᱞᱟᱹᱭ, ᱞᱟᱠᱪᱟᱨ, ᱨᱟᱹᱭ, ᱨᱤᱛ ᱮᱢᱟᱱ ᱡᱚᱛᱚᱣᱟᱜ ᱜᱮ ᱞᱤᱴᱟᱹ ᱴᱷᱟᱹᱠᱩᱤᱨ ᱴᱷᱮᱱ ᱥᱮᱬᱟ ᱟᱠᱟᱫᱼᱟ᱾ ᱚᱱᱟᱛᱮ ᱱᱩᱭ ᱴᱷᱟᱹᱠᱩᱨ ᱫᱚ ᱵᱟᱝ ᱵᱚᱱ ᱦᱤᱲᱤᱧ ᱠᱮᱭᱟ ᱟᱨ ᱚᱱᱟ ᱟᱲᱟᱝ ᱜᱮ ᱵᱚᱱ ᱨᱚᱲ ᱠᱟᱱᱟ᱾ ᱚᱱᱟᱛᱮ ᱱᱚᱶᱟ ᱫᱚ ᱵᱚᱝᱜᱟ ᱟᱲᱟᱝ ᱦᱚᱸ ᱵᱚᱱ ᱢᱮᱛᱟᱜ ᱠᱟᱱᱟ᱾ ᱱᱚᱶᱟ ᱟᱲᱟᱝ ᱛᱮᱜᱮ ᱛᱤᱥ ᱥᱮᱫᱟᱭ ᱡᱩᱜᱽ ᱠᱷᱚᱱ ᱪᱚᱝ ᱱᱚᱶᱟ ᱟᱲᱟᱝ ᱛᱮᱜᱮ ᱨᱚᱲ, ᱞᱟᱸᱫᱽ, ᱟᱨ ᱵᱩᱯᱩᱡᱷᱟᱹᱣ ᱵᱚᱱ ᱮᱯᱮᱢ ᱪᱟᱯᱟᱞ ᱠᱟᱱᱟ᱾ ᱱᱚᱶᱟ ᱟᱲᱟᱝ ᱛᱮᱜᱮ ᱵᱚᱝᱜᱟ ᱵᱩᱨᱩ ᱠᱚ ᱥᱚᱨᱚᱜ ᱯᱩᱨᱤ ᱠᱷᱚᱱ ᱟᱬᱜᱚ ᱦᱮᱡ ᱠᱟᱛᱮ ᱟᱵᱚ ᱠᱚ ᱥᱟᱶ ᱛᱮᱠᱚ ᱨᱚᱯᱚᱲᱚᱜ ᱠᱟᱱᱟ᱾ ᱱᱚᱶᱟ ᱟᱲᱟᱝ ᱛᱮᱜᱮ ᱵᱤᱥ ᱟᱹᱱᱤᱡ ᱵᱤᱧᱟᱜ ᱵᱤᱥ ᱦᱚᱸ ᱟᱬᱜᱚᱱ ᱠᱟᱱᱟ ᱟᱨ ᱨᱩᱣᱟᱹ ᱦᱟᱹᱥᱩ ᱦᱚᱸ ᱡᱷᱟᱹᱨᱱᱤ ᱢᱟᱱᱛᱟᱨ ᱛᱮᱜᱮ ᱵᱮᱥᱚᱜ ᱠᱟᱱᱟ᱾ ᱵᱤᱨ ᱵᱩᱨᱩ ᱨᱮᱱ ᱡᱚᱡᱚᱢ ᱠᱩᱞ ᱦᱚᱸ ᱱᱚᱶᱟ ᱟᱲᱟᱝ ᱛᱮᱠᱚ ᱥᱟᱦᱟᱜ ᱠᱟᱱᱟ᱾ ᱱᱚᱶᱟ ᱯᱟᱹᱨᱥᱤ ᱟᱲᱟᱝ ᱫᱚ ᱟᱹᱰᱤᱜᱮ ᱫᱟᱲᱮᱭᱟᱱᱟ ᱾ ᱟᱵᱚ ᱯᱤᱞᱪᱩ ᱜᱟᱬᱟ ᱠᱚ ᱪᱮ ᱠᱷᱮᱨᱣᱟᱲ ᱦᱚᱯᱚᱱ ᱠᱚ ᱱᱚᱶᱟ ᱯᱟᱹᱨᱥᱤ ᱟᱲᱟᱝ ᱨᱚᱲ ᱠᱟᱛᱮ ᱜᱮ ᱫᱷᱟᱹᱨᱛᱤ ᱟᱨ ᱫᱤᱥᱚᱢ ᱥᱟᱱᱟᱢ ᱵᱚ ᱪᱷᱟᱨᱟᱣ ᱟᱠᱟᱱ ᱜᱮᱭᱟ ᱱᱤᱛ ᱫᱷᱟᱹᱨᱤᱡ ᱨᱮᱦᱚᱸ᱾
ᱛᱚᱵᱮ ᱟᱵᱚ ᱠᱷᱮᱨᱣᱟᱲ ᱠᱚ ᱢᱩᱫᱽ ᱨᱮᱦᱚᱸ ᱴᱚᱴᱷᱟ ᱠᱚ ᱟᱹᱰᱤ ᱜᱟᱱ ᱟᱨ ᱮᱴᱟᱜ ᱡᱟᱹᱛᱤ ᱨᱤᱱ ᱦᱚᱲᱟᱜ ᱡᱟᱹᱨᱤ ᱤᱫᱤ ᱛᱮ ᱵᱤᱨ ᱵᱩᱨᱩ ᱠᱚᱨᱮ ᱟᱹᱰᱤ ᱫᱤᱱ ᱵᱤᱱ ᱛᱟᱦᱮᱸ ᱟᱠᱟᱱ ᱛᱮ ᱱᱟᱥᱮ ᱟᱲᱟᱝ ᱛᱟᱵᱚᱱ ᱫᱚ ᱵᱚᱫᱚᱞ ᱧᱚᱜ ᱟᱠᱟᱱᱟ᱾ ᱛᱚᱵᱮ ᱠᱷᱮᱨᱣᱟᱲ ᱠᱚ ᱢᱩᱫᱽ ᱨᱮ ᱡᱟᱱᱟᱢ ᱯᱟᱹᱨᱥᱤ ᱟᱲᱟᱝ ᱠᱚᱫᱚ ᱢᱤᱫ ᱫᱷᱟᱨᱟ ᱨᱚᱲᱚᱜ ᱠᱟᱱᱟ ᱪᱮ ᱟᱸᱡᱚᱢᱚᱜ ᱠᱟᱱᱟ᱾ ᱚᱱᱟᱛᱮ ᱯᱟᱹᱨᱥᱤ ᱯᱟᱹᱨᱩᱠᱷᱤᱭᱟᱹ ᱠᱚᱫᱚ ᱱᱚᱶᱟ ᱵᱷᱟᱥᱟ ᱪᱮ ᱟᱲᱟᱝ ᱫᱚ ᱚᱥᱴᱨᱤᱠ ᱯᱟᱹᱨᱥᱤ ᱟᱲᱟᱝ ᱜᱟᱸᱛᱟᱠ ᱨᱮᱠᱚ ᱞᱮᱠᱷᱟ ᱟᱠᱟᱫ ᱛᱟᱵᱚᱱᱟ᱾ ᱚᱥᱴᱨᱤᱪᱦ ᱜᱟᱸᱛᱟᱠ ᱯᱟᱹᱨᱥᱤ ᱟᱲᱟᱝ ᱞᱮᱠᱟ ᱛᱮᱫᱚ ᱥᱟᱱᱛᱟᱲ ᱯᱟᱹᱨᱥᱤ ᱟᱲᱟᱝ ᱜᱮ ᱥᱚᱢᱵᱤᱫᱷᱟᱱ ᱨᱮᱱᱟᱜ ᱤᱨᱟᱹᱞᱟᱹᱜ ᱫᱷᱟᱯ ᱨᱮ ᱴᱷᱟᱹᱶ ᱫᱚᱭ ᱧᱟᱢ ᱟᱠᱟᱫᱟ ᱒᱒ ᱫᱤᱥᱚᱢᱵᱟᱨ ᱒᱐᱐᱓ ᱨᱮ᱾ ᱚᱱᱟᱛᱮ ᱡᱚᱛᱚ ᱟᱹᱫᱤᱢ ᱠᱷᱮᱨᱣᱟᱲ ᱠᱚ ᱡᱩᱢᱤᱫ ᱠᱟᱛᱮ ᱡᱚᱛᱚ ᱱᱚᱶᱟ ᱟᱲᱟᱝ ᱵᱚᱱ ᱦᱟᱨᱟ ᱵᱩᱨᱩᱭ ᱠᱷᱟᱱ ᱟᱹᱫᱤᱢ ᱠᱷᱮᱨᱣᱟᱲ ᱠᱚ ᱟᱵᱚ ᱞᱮᱠᱟ ᱛᱮ ᱫᱤᱥᱚᱢ ᱫᱩᱱᱤᱭᱟ ᱨᱮᱵᱚᱱ ᱪᱤᱱᱦᱟᱹᱦᱟᱣᱜ ᱜᱮᱭᱟ᱾ ᱱᱚᱶᱟ ᱥᱟᱱᱛᱟᱲᱤ ᱯᱟᱹᱨᱥᱤ ᱫᱩᱞᱟᱹᱲ ᱠᱟᱛᱮ ᱥᱟᱱᱛᱟᱲᱤ ᱯᱟᱹᱨᱥᱤ ᱟᱲᱟᱝ ᱫᱚ ᱵᱚᱱ ᱠᱮᱴᱮᱡ ᱟᱨ ᱡᱤᱭᱟᱹᱲ ᱫᱚᱦᱚ ᱫᱟᱲᱮᱭᱟᱜᱼᱟ᱾ ᱤᱧ ᱫᱚ ᱥᱟᱱᱛᱟᱲᱤ ᱯᱟᱹᱨᱥᱤ ᱡᱤᱣᱤᱫ ᱫᱚᱦᱚ ᱫᱤᱥᱟᱹ ᱟᱨ ᱦᱩᱫᱤᱥ ᱠᱟᱛᱮ ᱜᱮ ᱱᱚᱜᱼᱚᱭ “ᱡᱟᱱᱟᱢ ᱯᱟᱹᱨᱥᱤ ᱟᱲᱟᱝ” ᱯᱩᱛᱷᱤ ᱟᱯᱮ ᱥᱟᱱᱟᱢ ᱫᱤᱥᱚᱢ ᱦᱚᱲ ᱴᱷᱮᱱᱤᱧ ᱯᱟᱨᱥᱟᱞ ᱥᱚᱫᱚᱨ ᱠᱮᱫᱟ᱾
ᱡᱟᱭᱨᱟᱢ ᱴᱩᱰᱩ
ᱚᱱᱚᱞᱤᱭᱟᱹ
No comments:
Post a Comment