ᱵᱟᱦᱟ ᱯᱚᱨᱚᱵ
ᱛᱟᱦᱮᱸ ᱠᱟᱛᱮ ᱦᱚᱸ ᱥᱚᱢᱟᱡᱽ ᱯᱟᱺᱭᱲᱤ ᱛᱚᱞ ᱨᱮᱱᱟᱜ ᱠᱩᱠᱢᱩ
ᱠᱚ ᱧᱮᱞ ᱞᱮᱫᱟ᱾ ᱦᱚᱲᱢᱚ ᱢᱚᱱᱮ ᱡᱤᱣᱤ ᱟᱣᱥᱟᱱ ᱞᱟᱜᱤᱫ
ᱯᱚᱨᱚᱵᱽ ᱯᱤᱦᱟᱹ ᱠᱚ ᱩᱱᱠᱩ ᱟᱠᱚ ᱞᱮᱠᱟ ᱠᱚ ᱪᱤᱭᱟᱹ ᱞᱮᱫᱟ᱾
ᱥᱟᱨᱟᱫᱤᱱ ᱵᱤᱨ ᱯᱟᱠᱟᱲ ᱨᱮ ᱥᱮᱸᱫᱮᱨᱟ ᱠᱟᱨᱮᱠᱟ ᱠᱟᱛᱮ
ᱥᱤᱜᱟᱺᱲ ᱚᱠᱛᱮ ᱥᱮᱝᱜᱮᱞ ᱡᱩᱸᱰᱤ ᱠᱟᱛᱮ ᱡᱩᱨᱩᱜ ᱡᱩᱨᱩᱜ ᱛᱮ
ᱟᱠᱚᱣᱟᱜ ᱞᱟᱭ ᱞᱟᱠᱪᱟᱨ ᱪᱤᱭᱟᱹ ᱨᱮᱱᱟᱜ ᱠᱟᱛᱷᱟ ᱫᱚ ᱱᱟᱜᱟᱢ
ᱨᱮ ᱢᱮᱱᱟᱜᱼᱟ᱾ ᱥᱚᱢᱟᱡᱽ ᱥᱮ ᱥᱟᱶᱛᱟ ᱨᱮ ᱥᱩᱞᱩᱠ ᱥᱩᱯᱩᱞᱩᱠ
ᱛᱟᱦᱮᱸ ᱠᱟᱛᱮ ᱢᱟᱱᱢᱤ ᱥᱚᱛᱛᱟ ᱡᱟᱜᱟᱣ ᱞᱟᱜᱤᱫ ᱜᱮ ᱯᱚᱨᱚᱵᱽ
ᱯᱤᱦᱟᱹ ᱨᱮᱱᱟᱜ ᱥᱤᱨᱡᱚᱱ᱾ ᱥᱟᱱᱛᱟᱲ ᱢᱩᱫᱽ ᱨᱮ ᱵᱟᱦᱟ ᱢᱟᱜ
ᱢᱚᱲᱮ ᱯᱚᱨᱚᱵᱽ ᱫᱚ ᱡᱟᱸᱠ ᱡᱚᱢᱚᱠ ᱟᱛᱮ ᱨᱟᱹᱥᱠᱟᱹ ᱟᱨ ᱪᱟᱦᱩᱸᱴ
ᱟᱛᱮ ᱵᱚᱱ ᱢᱟᱱᱟᱣ ᱮᱫᱟ᱾ ᱦᱮᱥᱮᱡ ᱥᱮᱠᱨᱮᱡ ᱨᱟᱹᱥᱠᱟᱹ ᱟᱨ
ᱪᱷᱩᱨᱛᱮ ᱟᱵᱚᱨᱮᱱ ᱵᱚᱝᱜᱟ ᱴᱷᱮᱱ ᱠᱷᱚᱱ ᱫᱤᱞ ᱫᱟᱲᱮ ᱧᱟᱢ
ᱞᱟᱹᱜᱤᱫ ᱯᱤᱲᱤ ᱯᱤᱲᱤ ᱵᱚᱱ ᱥᱮᱵᱟ ᱟᱠᱚ ᱠᱟᱱᱟ᱾ ᱟᱵᱚ
ᱥᱟᱱᱛᱟᱲ ᱫᱚ ᱵᱚᱝᱜᱟ ᱦᱚᱯᱚᱱ, ᱵᱚᱝᱜᱟ ᱴᱷᱮᱱ ᱠᱷᱚᱱ ᱠᱤᱨᱯᱟ
ᱧᱟᱢ ᱞᱟᱜᱤᱫ ᱟᱵᱚ ᱟᱜ ᱢᱟᱱᱢᱤ ᱥᱚᱛᱛᱟ ᱵᱚᱱ ᱡᱟᱜᱟᱣ ᱮᱫᱟ
ᱯᱚᱨᱚᱵᱽ ᱯᱤᱦᱟᱹ ᱛᱟᱞᱟᱨᱮ ᱢᱟᱨᱟᱝ ᱢᱚᱦᱚᱛ ᱠᱟᱹᱢᱤ ᱟᱨ
ᱩᱛᱷᱱᱟᱹᱣ ᱨᱟᱠᱟᱵ ᱞᱟᱜᱤᱫ᱾ ᱵᱟᱦᱟ ᱥᱟᱝ ᱢᱟᱜ ᱢᱚᱲᱮ ᱫᱚ
ᱥᱤᱞᱤ ᱥᱩᱛᱟᱹᱢ ᱛᱮ ᱛᱚᱞ ᱢᱮᱱᱟᱜᱼᱟ, ᱢᱤᱫ ᱴᱟᱝ ᱯᱚᱨᱚᱵᱽ
ᱨᱮᱱᱟᱜ ᱜᱮ ᱵᱟᱨᱭᱟ ᱨᱩᱯ᱾ ᱵᱟᱦᱟ ᱵᱮᱜᱚᱨ ᱢᱟᱜ ᱢᱚᱲᱮ ᱫᱚ
ᱵᱟᱭ ᱯᱷᱚᱴᱮᱞᱚᱜᱼᱟ᱾
ᱵᱟᱦᱟ ᱟᱨ ᱢᱟᱜ ᱢᱚᱲᱮ ᱨᱮᱱᱟᱜ ᱥᱤᱨᱡᱚᱱ ᱱᱟᱜᱟᱢ
ᱵᱟᱰᱟᱭ ᱞᱟᱹᱜᱤᱫ ᱫᱚ ᱟᱨ ᱦᱚᱸ ᱜᱟᱹᱦᱤᱨ ᱥᱟᱞᱟᱜ ᱵᱟᱦᱟ
ᱯᱚᱨᱚᱵᱽ ᱨᱮᱱᱟᱜ ᱪᱟᱨᱪᱟᱣ ᱞᱟᱹᱜᱽᱛᱤᱭᱟ᱾ ᱵᱟᱦᱟ ᱯᱚᱨᱚᱵᱽ
ᱨᱮᱱᱟᱜ ᱟᱠᱠᱷᱚᱨᱤᱠ ᱢᱟᱱᱮ ᱫᱚ ᱥᱟᱲ ᱵᱟᱦᱟ᱾ ᱥᱟᱲ ᱵᱟᱦᱟᱜᱮ
ᱥᱤᱨᱡᱚᱱ ᱥᱤᱠᱲᱤᱭ ᱥᱟᱵ ᱫᱚᱦᱚᱭᱟ᱾ ᱵᱟᱦᱟ ᱨᱮᱱᱟᱜ ᱯᱮ
ᱞᱮᱠᱟᱱᱟᱜ ᱡᱩᱰᱟᱹᱥᱤ ᱨᱩᱯ ᱢᱮᱱᱟᱜᱼᱟ ᱪᱮᱫ ᱞᱮᱠᱟ, ᱵᱷᱩᱴᱩᱜ
ᱵᱟᱦᱟ, ᱥᱟᱲ ᱵᱟᱦᱟ ᱟᱨ ᱢᱚᱥᱚᱫ ᱵᱟᱦᱟ᱾ ᱥᱩᱪᱤ ᱥᱟᱯᱷᱟ
ᱨᱩᱯ ᱛᱮ ᱫᱚ ᱵᱷᱩᱴᱩᱜ ᱵᱟᱦᱟ ᱨᱮᱱᱟᱜ ᱠᱚᱫᱚᱨ ᱢᱮᱱᱟᱜ ᱨᱮᱦᱚᱸ
ᱥᱟᱲ ᱵᱟᱦᱟ ᱫᱚ ᱥᱤᱨᱡᱚᱱᱮ ᱪᱤᱭᱟᱹ ᱟᱠᱟᱫᱟ᱾ ᱵᱟᱦᱟ ᱤᱫᱤ
ᱠᱟᱛᱮ ᱢᱟᱡᱷᱤ ᱵᱟᱵᱟ ᱠᱚ ᱢᱤᱫ ᱥᱟᱶᱛᱮ ᱱᱮᱸᱰᱟ ᱨᱮᱱᱟᱜ
ᱠᱟᱛᱷᱟ ᱫᱚ ᱵᱟᱝᱠᱚ ᱞᱟᱹᱭᱮᱫᱟ᱾ ᱚᱠᱚᱭ ᱠᱚ ᱢᱮᱢᱮᱱ ᱠᱟᱱᱟ
ᱯᱷᱟᱜᱩᱱ ᱵᱚᱝᱜᱟ ᱫᱚ ᱥᱟᱨᱡᱚᱢ ᱵᱟᱦᱟ ᱵᱟᱦᱟᱜᱼᱟ, ᱢᱟᱛᱠᱚᱢ
ᱜᱮᱞᱮᱜᱼᱟ, ᱤᱪᱟᱹᱜ ᱵᱟᱦᱟ, ᱢᱩᱨᱩᱫ ᱵᱟᱦᱟᱛᱮ ᱱᱟᱣᱟᱛᱮ ᱟᱛᱳ
ᱰᱤ ᱥᱟᱡᱟᱜᱼᱟ᱾ ᱟᱵᱚ ᱥᱟᱱᱛᱟᱲ ᱫᱚ ᱵᱟᱦᱟ ᱟᱣᱨᱤ ᱨᱮ ᱫᱚ
ᱢᱩᱨᱩᱫ ᱦᱚᱸ ᱵᱟᱵᱚᱱ ᱪᱮᱯᱮᱡᱟ᱾ ᱥᱟᱨᱡᱚᱢ ᱵᱟᱦᱟ ᱵᱟᱵᱚᱱ
ᱵᱟᱦᱟᱭᱟ, ᱢᱟᱛᱠᱚᱢ ᱜᱮᱞᱮ ᱦᱚᱸ ᱵᱟᱵᱚᱱ ᱡᱚᱢᱟ᱾ ᱱᱤᱭᱟᱹᱜᱮ
ᱥᱟᱥᱛᱚᱨ ᱛᱟᱵᱚᱱ᱾ ᱪᱮᱫ ᱞᱮᱠᱟᱺᱼ “ᱫᱤᱱᱟᱹᱢ ᱞᱮᱠᱟᱜᱮ
ᱮᱱᱦᱤᱞᱚᱜ ᱦᱚᱸ ᱪᱟᱸᱯᱟᱠᱤᱭᱟᱹ ᱵᱟᱲᱮᱹ ᱞᱟᱛᱟᱨ ᱨᱮ ᱥᱟᱛ ᱠᱩᱲᱤ
ᱠᱚ ᱡᱷᱤᱞᱟᱹᱜ ᱠᱟᱱᱟ᱾ ᱥᱟᱛ ᱠᱩᱲᱤ ᱢᱮᱱ ᱫᱚ ᱦᱤᱸᱥᱤ, ᱰᱩᱢᱱᱤ,
ᱪᱷᱤᱛᱟᱹ, ᱠᱟᱯᱩ, ᱫᱟᱺᱲᱜᱤ, ᱯᱩᱸᱲᱜᱤ ᱟᱨ ᱜᱩᱭᱨᱤ᱾ ᱩᱱᱠᱩ ᱨᱟᱹᱥᱠᱟᱹ
ᱩᱞᱞᱟᱥ ᱟᱛᱮ ᱠᱚ ᱡᱷᱤᱞᱟᱹᱜ ᱠᱟᱱᱟ ᱚᱱᱟ ᱚᱠᱛᱮ ᱡᱷᱤᱨᱚ ᱡᱷᱚᱨᱚ
ᱡᱮᱹᱞ ᱮ ᱯᱟᱨᱚᱢᱮᱱᱟ᱾ ᱩᱱᱤ ᱡᱮᱹᱞ ᱯᱤᱪᱷᱹᱛᱮᱜᱮ ᱥᱤᱠᱟᱹᱨᱤ ᱠᱚᱦᱚᱸ
ᱪᱟᱸᱯᱟᱠᱤᱭᱟᱹ ᱵᱟᱲᱮᱹ ᱞᱟᱛᱟᱨ ᱨᱮᱠᱚ ᱥᱮᱴᱮᱨᱮᱱᱟ᱾ ᱯᱳᱭᱞᱳ
ᱢᱮᱫ ᱢᱮᱫ ᱧᱟᱯᱟᱢ ᱛᱮᱜᱮ ᱩᱱᱠᱩᱣᱟᱜ ᱦᱚᱲᱢᱚ ᱥᱮᱝᱜᱮᱞ ᱞᱮᱠᱟ
ᱡᱳᱞᱮᱱᱟ᱾ ᱥᱟᱛ ᱠᱩᱲᱤ ᱵᱟᱝᱠᱚ ᱦᱩᱫᱤᱥ ᱫᱟᱲᱮᱹᱭᱟᱠᱟᱫᱟ ᱡᱮ
ᱱᱩᱱᱟᱹᱜ ᱢᱟᱨᱟᱝ ᱚᱴᱚᱝᱠᱚᱞᱤ ᱵᱤᱨᱨᱮ ᱟᱨᱦᱚᱸ ᱢᱟᱱᱣᱟ ᱢᱮᱱᱟᱜ
ᱠᱚᱣᱟ ᱥᱤᱨᱡᱚᱱ ᱦᱮᱛᱩ ᱜᱮ ᱱᱚᱝᱠᱟ᱾ ᱢᱟᱨᱟᱝ ᱵᱩᱨᱩ ᱟᱠᱟᱨ
ᱱᱤᱨᱟᱠᱟᱨ ᱛᱟᱞᱟᱨᱮᱜᱮ ᱛᱟᱦᱮᱸᱱᱟᱭ᱾ ᱩᱱᱤ ᱫᱚ ᱱᱚᱣᱟ ᱡᱮᱜᱮᱫ
ᱫᱷᱟᱨᱛᱤ ᱜᱚᱴᱟᱜᱮ ᱢᱮᱱᱟᱭᱟ᱾ ᱩᱱ ᱨᱮᱱᱟᱜ ᱥᱤᱨᱡᱚᱱ ᱥᱮᱨᱮᱧ
ᱱᱚᱝᱠᱟᱺᱼ
“ᱰᱟᱦᱟᱨ ᱫᱷᱩᱲᱤ ᱯᱩᱨᱩᱭ ᱯᱩᱨᱩᱭ ᱛᱩᱞᱟᱹᱢ ᱞᱮᱠᱟ ᱚᱴᱟᱝ
ᱮᱱ
ᱡᱤᱣᱤ ᱦᱚᱸ ᱦᱟᱫᱽ ᱵᱟᱫᱮ ᱦᱟᱫᱽ ᱵᱟᱫᱮ ᱯᱟᱨᱚᱢᱮᱱ
ᱥᱤᱠᱟᱹᱨᱤᱭᱟᱹ ᱛᱮᱨᱟᱝ ᱥᱟᱨᱛᱮ ᱢᱟᱭᱟᱢ ᱚᱱᱮ ᱞᱤᱸᱜᱤᱭᱮᱱ
ᱪᱟᱸᱯᱟᱠᱤᱭᱟᱹ ᱵᱟᱲᱮᱹ ᱞᱟᱛᱟᱨ ᱨᱮ ᱢᱩᱡ ᱠᱚ ᱢᱟᱠᱚ ᱢᱩᱡ
ᱠᱚ ᱢᱟᱠᱚ ᱫᱩᱸᱜᱩᱫ ᱫᱩᱸᱜᱩᱫ’’
ᱥᱤᱥᱤᱨᱡᱟᱹᱣᱤᱡ ᱚᱠᱟ ᱞᱮᱠᱟᱛᱮᱭ ᱥᱤᱨᱡᱚᱱ ᱱᱚᱣᱟ ᱫᱚ
ᱚᱦᱚᱵᱚᱱ ᱞᱟᱹᱭ ᱠᱮᱭᱟ᱾ ᱥᱤᱨᱡᱚᱱ ᱨᱮᱱᱟᱜ ᱢᱚᱦᱚᱠ ᱥᱚᱱᱫᱷᱟᱲ
ᱱᱤᱛ ᱦᱚᱸ ᱠᱩᱠᱢᱩ ᱨᱮ ᱵᱷᱟᱥᱟᱜᱼᱟ ᱛᱟᱠᱮᱨ ᱛᱟᱠᱮᱨᱛᱮ᱾
ᱪᱟᱸᱯᱟᱠᱤᱭᱟᱹ ᱵᱟᱲᱮᱹ, ᱰᱟᱦᱟᱨ ᱫᱷᱩᱲᱤ ᱥᱤᱭᱚᱜ, ᱡᱷᱟᱨᱱᱟ
ᱫᱟᱜ ᱞᱩ ᱡᱚᱛᱚᱜᱮ ᱥᱤᱨᱡᱚᱱ ᱨᱮᱱᱟᱜ ᱯᱨᱚᱛᱤᱠ ᱚᱱᱟ ᱠᱚ
ᱥᱟᱠᱷᱤ ᱠᱟᱛᱮ ᱜᱮ ᱥᱟᱛ ᱠᱚᱲᱟ ᱥᱟᱛ ᱠᱩᱲᱤ ᱥᱮᱨᱮᱧ ᱛᱮᱠᱚ
ᱨᱚᱯᱚᱲ ᱛᱟᱸᱦᱮᱫ ᱪᱮᱫ ᱞᱮᱠᱟ ᱺᱼ
ᱰᱟᱦᱟᱨ ᱫᱷᱩᱲᱤ ᱥᱤᱭᱚᱜ ᱠᱟᱱᱵᱮᱱ ᱥᱤᱞᱤ ᱞᱮᱠᱟᱱ
ᱠᱚᱲᱟᱠᱤᱱ
ᱟᱵᱮᱱ ᱨᱮᱱᱟᱜ ᱡᱟᱛᱤ ᱯᱟᱨᱤᱥ ᱫᱚ ᱞᱟᱹᱭᱵᱮᱱ ᱡᱟ
ᱠᱚᱲᱟᱠᱤᱱ?
ᱩᱱᱨᱮ ᱛᱮᱞᱟ ᱟᱛᱮ ᱠᱚᱲᱟᱠᱤᱱ ᱞᱟᱹᱭ ᱟ ᱺᱼ
ᱟᱞᱤᱧ ᱨᱮᱱᱟᱜ ᱡᱟᱛᱤ ᱯᱟᱨᱤᱥ ᱧᱟᱢ ᱠᱟᱱᱵᱮᱱ ᱠᱩᱲᱤᱠᱤᱱ
ᱟᱞᱤᱧ ᱨᱮᱱᱟᱜ ᱡᱟᱛᱤ ᱯᱟᱨᱤᱥ ᱫᱚ ᱦᱮᱸᱥᱮᱞ ᱯᱟᱸᱭᱲᱟ ᱠᱚᱪᱮ
ᱠᱟᱸᱲᱵᱟ ᱡᱟᱛᱤ ᱛᱟᱞᱤᱧ᱾
ᱠᱩᱲᱤ ᱠᱤᱱ ᱦᱚᱸ ᱠᱤᱱ ᱞᱟᱹᱭ ᱟ ᱺᱼ
ᱟᱞᱤᱧ ᱨᱮᱱᱟᱜ ᱡᱟᱛᱤ ᱯᱟᱨᱤᱥ ᱫᱚ ᱨᱮᱭᱟᱲ ᱠᱟᱸᱰᱟ ᱠᱤᱛᱟᱹ
ᱠᱟᱹᱰᱦᱩᱢ ᱡᱟᱛᱤᱜᱮ᱾
ᱩᱱ ᱨᱮᱜᱮ ᱯᱤᱞᱪᱩ ᱦᱟᱲᱟᱢ ᱯᱤᱞᱪᱩ ᱵᱩᱲᱦᱤ ᱟᱠᱤᱱ ᱨᱮᱱ
ᱯᱚᱼᱯᱚᱸᱜᱲᱟ ᱛᱷᱟᱹᱭ ᱛᱷᱤᱛᱤ ᱞᱟᱹᱜᱤᱫ ᱞᱟᱭ ᱞᱟᱜᱽᱪᱟᱨ ᱠᱤᱱ
ᱜᱚᱴᱟ ᱵᱩᱴᱟᱹ ᱠᱮᱫᱟ᱾ ᱩᱱᱠᱩ ᱥᱟᱛ ᱠᱚᱲᱟ ᱥᱟᱛ ᱠᱩᱲᱤ
ᱫᱷᱩᱲᱤᱛᱮ ᱤᱛᱩᱫ ᱥᱤᱸᱫᱩᱨ ᱠᱟᱛᱮ ᱵᱟᱦᱟ ᱵᱚᱝᱜᱟ ᱞᱟᱜᱤᱫ
ᱨᱚᱲᱠᱤᱱ ᱵᱟᱲᱛᱤ ᱠᱮᱫᱟ᱾ ᱩᱱᱨᱮᱜᱮ ᱥᱤᱛᱟᱹ ᱱᱟᱞᱟ ᱫᱷᱚᱨᱚᱢ
ᱯᱩᱠᱷᱨᱤᱨᱮ ᱩᱢ ᱠᱟᱛᱮ ᱵᱟᱦᱟ ᱵᱚᱝᱜᱟ ᱮᱛᱚᱦᱚᱵ ᱞᱮᱱᱟ
ᱨᱟᱹᱥᱠᱟᱹ ᱟᱨ ᱩᱞᱞᱟᱥ ᱛᱮ᱾ ᱤᱱᱟᱹᱛᱮ ᱱᱤᱛᱚᱜ ᱦᱚᱸ ᱵᱟᱦᱟᱨᱮ
ᱱᱟᱣᱟ ᱵᱟᱦᱩ ᱡᱟᱣᱟᱭ ᱫᱚ ᱫᱟᱸᱬᱮ ᱠᱚ ᱮᱢ ᱜᱮᱭᱟ᱾ ᱵᱟᱦᱟ
ᱛᱟᱭᱚᱢ ᱜᱮ ᱢᱟᱜ ᱢᱚᱲᱮ᱾ ᱯᱟᱦᱤᱞ ᱢᱟᱜ ᱢᱚᱲᱮ ᱡᱟᱸᱦᱟ ᱛᱤᱥ
ᱡᱚᱠᱷᱮᱡ ᱦᱳᱭᱳᱜ ᱛᱟᱸᱦᱮᱫ ᱪᱮᱫ ᱞᱮᱠᱟ ᱟᱛᱳᱨᱮ ᱫᱩᱠ ᱵᱤᱯᱚᱫᱽ
ᱵᱟᱦᱟ ᱢᱟᱜ ᱢᱚᱲᱮ
ᱫᱩᱨᱜᱟᱫᱟᱥ ᱥᱚᱨᱮᱱ, ᱠᱳᱞᱠᱟᱛᱟ
ᱦᱳᱭᱞᱮᱱ ᱠᱷᱟᱱ ᱵᱟᱦᱟ ᱵᱚᱝᱜᱟ ᱞᱟᱦᱟ, ᱟᱭᱳ ᱨᱩᱣᱟᱹ ᱦᱳᱭ
ᱞᱮᱱᱠᱷᱟᱱ ᱵᱟᱦᱟ ᱵᱚᱝᱜᱟᱨᱮ, ᱟᱛᱳ ᱨᱮᱠᱚ ᱵᱚᱝᱜᱟ ᱛᱟᱞᱟ
ᱞᱮᱱᱠᱷᱟᱱ ᱵᱟᱦᱟ ᱥᱩᱨ ᱚᱠᱛᱮ, ᱢᱚᱲᱮᱠᱚ ᱛᱩᱨᱩᱭ ᱠᱚᱠᱚ ᱩᱥᱟᱹᱫ
ᱞᱮᱱᱠᱷᱟᱱ ᱩᱱᱨᱮ ᱢᱟᱜ ᱢᱚᱲᱮ ᱫᱚᱠᱚ ᱧᱩᱢᱟᱜᱼᱟ᱾ ᱵᱟᱦᱟ ᱟᱨ ᱢᱟᱜ
ᱢᱚᱲᱮ ᱨᱮᱱᱟᱜ ᱱᱮᱣ ᱱᱮᱢᱟᱪᱟᱨ ᱯᱩᱡᱟᱹ ᱯᱟᱥᱟ ᱫᱚ ᱢᱤᱫ ᱜᱮᱭᱟ᱾
ᱵᱷᱮᱜᱟᱨ ᱫᱚ ᱵᱟᱦᱟ ᱫᱚ ᱯᱮ ᱢᱟᱦᱟ ᱨᱮᱱᱟᱜ ᱟᱨ ᱢᱟᱜ ᱢᱚᱲᱮ
ᱫᱚ ᱢᱤᱫ ᱫᱤᱱ ᱯᱩᱡᱟᱹ ᱯᱟᱥᱟ ᱠᱟᱛᱮ ᱧᱤᱫᱟᱹ ᱠᱚ ᱮᱱᱮᱡ ᱟᱸᱜᱟᱭᱟ᱾
ᱢᱟᱜ ᱢᱚᱲᱮ ᱨᱮᱫᱚ ᱥᱤᱸᱜᱟᱹᱲ ᱵᱮᱲᱟ ᱦᱟᱱᱛᱮ ᱱᱟᱛᱮ ᱠᱷᱚᱱ ᱛᱩᱢᱫᱟᱜ
ᱴᱟᱢᱟᱠ ᱟᱛᱮ ᱮᱱᱮᱡ ᱠᱚ ᱦᱤᱡᱩᱜᱼᱟ᱾ ᱩᱱᱠᱩ ᱦᱚᱸ ᱟᱛᱳ ᱦᱚᱲᱮ
ᱵᱮᱣᱦᱟᱨ ᱠᱚᱣᱟ ᱫᱟᱨᱟᱢ ᱠᱚᱣᱟ᱾ ᱢᱟᱱᱢᱤ ᱡᱚᱱᱚᱢ ᱠᱟᱛᱮ ᱪᱟᱸᱫᱳ
ᱟᱜ ᱦᱚᱢᱚᱨ ᱥᱮᱨᱮᱧ ᱜᱮ ᱢᱚᱦᱚᱛ ᱠᱟᱹᱢᱤ᱾ ᱢᱟᱨᱟᱝ ᱵᱩᱨᱩ ᱞᱟᱹᱜᱤᱫ
ᱜᱮ ᱟᱵᱚ ᱟᱜ ᱢᱚᱱ ᱩᱫᱟᱹ ᱫᱟᱸᱜᱟᱲᱚᱜᱼᱟ᱾ ᱩᱱᱤᱜᱮ ᱥᱮᱨᱮᱧ ᱛᱟᱞᱟ
ᱛᱮᱵᱚ ᱚᱬᱦᱮᱸᱭᱮᱭᱟ ᱪᱮᱫ ᱞᱮᱠᱟ ᱠᱟᱺᱥᱟᱹᱭ ᱠᱩᱢᱟᱨᱤ ᱟᱛᱩ ᱟᱛᱩᱛᱮ
ᱜᱟᱝ ᱱᱟᱹᱭ ᱥᱟᱝ ᱢᱮᱥᱟᱜ ᱥᱟᱱᱟᱭᱮᱭᱟ᱾ ᱢᱟᱱᱢᱤ ᱡᱤᱭᱚᱱᱨᱮ ᱵᱟᱨᱭᱟ
ᱟᱹᱰᱤ ᱡᱟᱨᱩᱲᱟᱜ, ᱢᱤᱫ ᱫᱚ ᱟᱵᱚᱣᱟᱜ ᱡᱤᱭᱚᱱ ᱨᱩᱠᱷᱤᱭᱟᱹ ᱟᱨ
ᱩᱛᱷᱱᱟᱹᱣ ᱵᱟᱵᱚᱛ ᱦᱟᱱᱟᱯᱩᱨᱤᱨᱮ ᱥᱟᱱᱛᱤᱛᱮ ᱛᱟᱸᱦᱮᱱ ᱾
ᱦᱟᱱᱟᱯᱩᱨᱤᱨᱮ ᱥᱟᱱᱛᱤᱛᱮ ᱛᱟᱸᱦᱮᱱ ᱞᱟᱦᱤᱫ ᱜᱮ ᱱᱩᱱᱟᱹᱜ ᱱᱮᱣ
ᱱᱮᱢᱟᱪᱟᱨ, ᱱᱩᱱᱟᱹᱜ ᱫᱷᱚᱨᱚᱢ ᱠᱚᱨᱚᱢ᱾ ᱟᱵᱚᱣᱟᱜ ᱥᱟᱥᱛᱚᱨ ᱨᱮ
ᱢᱮᱱᱟᱜᱼᱟ ᱟᱵᱚ ᱫᱚ ᱢᱟᱡᱦᱤ ᱦᱚᱯᱚᱱ ᱥᱮ ᱵᱚᱝᱜᱟ ᱦᱚᱯᱚᱱ ᱱᱚᱣᱟ
ᱨᱮᱱᱟ ᱟᱯᱟᱞᱦᱮᱸᱫ ᱠᱚᱜᱮ ᱠᱟᱛᱷᱟ ᱫᱚ ᱟᱰᱤ ᱜᱟᱦᱤᱨᱟ᱾ ᱱᱚᱣᱟ
ᱫᱚ ᱥᱟᱱᱟᱢ ᱠᱚᱜᱮ ᱵᱩᱡᱷᱟᱹᱣ ᱦᱳᱭᱳᱜ ᱛᱟᱵᱚᱱᱟ᱾ ᱢᱟᱜ ᱢᱚᱲᱮ
ᱨᱮᱱᱟᱜ ᱜᱟᱹᱦᱤᱨ ᱨᱟᱥᱟ ᱦᱚᱸ ᱪᱮᱯᱮᱡ ᱡᱟᱨᱩᱲᱟ᱾ ᱵᱟᱝᱠᱷᱟᱱ ᱮᱱᱠᱟ
ᱟᱨ ᱵᱚᱠᱟ᱾ ᱪᱮᱫ ᱞᱮᱠᱟ ᱟᱵᱚ ᱵᱚᱱ ᱧᱮᱞ ᱜᱮᱭᱟ ᱡᱟᱸᱦᱟ ᱛᱤᱱᱟᱹᱜ
ᱨᱤᱢᱤᱞᱛᱮ ᱥᱤᱧ ᱪᱟᱸᱫᱳᱭ ᱮᱥᱮᱫᱮ ᱨᱮᱸᱦᱚ ᱠᱟᱴᱤᱡ ᱟᱞᱳ ᱫᱚ ᱪᱷᱤᱴᱠᱟᱣ
ᱩᱰᱩᱠ ᱠᱚᱜ ᱜᱮᱭᱟ᱾ ᱢᱟᱱᱢᱤ ᱫᱷᱚᱨᱚᱢ ᱨᱮᱱᱟᱜ ᱱᱚᱣᱟᱜᱮ ᱫᱟᱲᱮᱹ᱾
ᱢᱟᱨᱟᱝ ᱵᱩᱨᱩ ᱢᱮᱱ ᱫᱚ ᱡᱚᱛᱚ ᱠᱷᱚᱱ ᱢᱟᱨᱟᱝ ᱡᱟᱸᱦᱟ ᱵᱩᱨᱩ,
ᱡᱟᱸᱦᱟᱨᱮ ᱥᱤᱨᱡᱚᱱ ᱢᱮᱱᱟᱜᱼᱟ, ᱡᱟᱸᱦᱟᱭᱟᱜ ᱥᱤᱢᱟᱹ ᱵᱟᱱᱩᱜᱼᱟ,
ᱟᱠᱟᱨᱮ ᱱᱤᱨᱟᱠᱟᱨ ᱜᱚᱴᱟᱜᱮ ᱢᱮᱱᱟᱭᱟ, ᱡᱟᱸᱦᱟᱭᱟᱜ ᱠᱷᱚᱭ ᱵᱚᱭ
ᱵᱟᱱᱩᱜ ᱩᱱᱤᱜᱮ ᱥᱤᱨᱡᱚᱱᱤᱭᱟᱹ ᱥᱚᱨᱚᱜᱽ ᱯᱩᱨᱤ, ᱫᱷᱟᱨᱛᱤ ᱯᱩᱨᱤ,
ᱯᱟᱛᱟᱞ ᱯᱩᱨᱤ ᱜᱚᱴᱟᱜᱮ ᱩᱱᱤ᱾ ᱩᱱᱤᱭᱟᱜ ᱢᱩᱦᱤᱢ ᱛᱮᱜᱮ ᱩᱱᱤ ᱴᱷᱮᱱ
ᱢᱮᱥᱟᱜ ᱟᱵᱚᱱ᱾ ᱪᱮᱫ ᱞᱮᱠᱟ ᱟᱛᱢᱟ ᱢᱮᱱ ᱫᱚ ᱡᱤᱣᱤ ᱟᱸᱯᱬᱮᱱᱟᱜ
ᱡᱤᱣᱤ᱾ ᱟᱸᱯᱬᱮ ᱥᱩᱪᱤ ᱵᱷᱟᱵᱽ ᱛᱮᱜᱮ ᱢᱟᱨᱟᱝ ᱵᱩᱨᱩ ᱴᱷᱮᱱ
ᱥᱮᱴᱮᱨᱚᱜ ᱦᱚᱨ᱾ ᱩᱱᱤᱜᱮ ᱡᱚᱛᱚ ᱟᱛᱢᱟᱭ ᱫᱷᱟᱨᱚᱱ ᱟᱠᱟᱫᱟ ᱤᱱᱟᱹᱛᱮ
ᱩᱱᱟᱹᱜ ᱢᱟᱨᱟᱝ᱾ ᱚᱱᱠᱟᱜᱮ ᱢᱤᱫ ᱴᱟᱝ ᱵᱟᱦᱟ ᱥᱮᱨᱮᱧ ᱱᱤᱛ ᱦᱚᱸ
ᱵᱚᱱ ᱧᱩᱢ ᱦᱟᱞᱟᱝᱼᱟ ᱟᱰᱤ ᱜᱟᱹᱦᱤᱨ ᱥᱟᱞᱟᱜ ᱺᱼ
“ᱛᱚᱠᱚᱭ ᱢᱟᱭ ᱥᱟᱵ ᱠᱮᱫ ᱦᱳ ᱥᱟᱢᱟᱱᱚᱢ ᱠᱟᱹᱯᱤ
ᱛᱚᱠᱚᱭ ᱢᱟᱭ ᱦᱚᱵᱚᱨ ᱠᱮᱫ ᱦᱳ ᱨᱟᱹᱝᱜᱟᱹᱭᱱᱤ ᱢᱟ ᱛᱚᱲᱟ᱾
ᱢᱟᱨᱟᱝ ᱵᱩᱨᱩᱭ ᱥᱟᱵ ᱠᱮᱫ ᱦᱳ ᱥᱟᱢᱟᱱᱚᱢ ᱠᱟᱹᱯᱤ
ᱡᱟᱦᱮᱨ ᱮᱨᱟᱭ ᱥᱟᱵ ᱠᱮᱫ ᱦᱳ ᱨᱟᱹᱝᱜᱟᱹᱭᱱᱤ ᱢᱟ ᱛᱚᱲᱟ᱾
ᱠᱟᱹᱯᱤ ᱢᱟ ᱠᱟᱹᱯᱤ ᱦᱳ ᱥᱟᱢᱟᱱᱚᱢ ᱠᱟᱯᱤ
ᱛᱚᱲᱟ ᱢᱟ ᱛᱚᱲᱟ ᱦᱳ ᱨᱟᱹᱝᱜᱟᱹᱭᱱᱤ ᱢᱟ ᱛᱚᱲᱟ᱾”
ᱢᱟᱜ ᱢᱚᱲᱮ ᱨᱮ ᱫᱚ ᱞᱟᱴᱩ ᱫᱟᱬᱮ, ᱢᱟᱨᱟᱝ ᱵᱩᱨᱩ ᱫᱚ ᱯᱳᱸᱰ
ᱵᱚᱫᱟ, ᱡᱟᱦᱮᱨ ᱮᱨᱟ ᱫᱚ ᱜᱩᱞᱤ ᱯᱟᱹᱴᱷᱤ ᱟᱨ ᱢᱚᱬᱮᱠᱚ ᱛᱩᱨᱩᱭ
ᱠᱚ ᱫᱚ ᱜᱚᱞᱟ ᱵᱚᱫᱟ ᱥᱮ ᱠᱟᱵᱨᱟ ᱯᱟᱸᱴᱷᱟ᱾ ᱚᱱᱠᱟᱜᱮ ᱵᱟᱦᱟᱨᱮ
ᱫᱚ ᱠᱟᱴᱤᱡ ᱫᱟᱬᱮ ᱵᱚᱱ ᱫᱮᱵᱟ ᱥᱮᱵᱟ ᱠᱚᱣᱟ᱾ ᱯᱳᱭᱞᱳ ᱛᱷᱚᱠ
ᱨᱮᱱᱟᱜ ᱵᱟᱦᱟ ᱥᱮᱨᱮᱧ ᱡᱟᱸᱦᱟ ᱫᱚ ᱡᱟᱦᱮᱨ ᱵᱩᱴᱟᱹ ᱨᱮᱵᱚᱱ
ᱥᱮᱨᱮᱧᱟ᱾ ᱱᱟᱭᱠᱮ ᱚᱲᱟᱜ ᱨᱮᱵᱚᱱ ᱥᱮᱨᱮᱧᱟ, ᱡᱟᱦᱸᱟ ᱫᱚ ᱫᱷᱟᱨᱛᱤ
ᱥᱤᱨᱡᱚᱱ ᱨᱮᱱᱟᱜ ᱥᱮᱨᱮᱧ ᱺᱼ
“ᱦᱮᱥᱟᱜ ᱢᱟ ᱪᱚᱴᱨᱮ ᱡᱟ ᱜᱚᱸᱥᱟᱭ ᱛᱩᱫᱮ ᱫᱚᱭ ᱨᱟᱜᱮ ᱠᱟᱱ
ᱵᱟᱲᱮᱹ ᱢᱟ ᱞᱟᱨᱮᱨᱮ ᱡᱟ ᱜᱚᱸᱥᱟᱭ ᱜᱳᱛᱨᱳᱫ ᱫᱚᱭ ᱥᱟᱸᱦᱮᱫᱟ
ᱫᱮᱹᱥ ᱪᱚᱝ ᱱᱟᱪᱩᱨᱮᱱ ᱡᱟ ᱜᱚᱸᱥᱟᱭ ᱛᱩᱫᱮ ᱫᱚᱭ ᱨᱟᱜᱮ ᱠᱟᱱ
ᱫᱤᱥᱚᱢ ᱪᱚᱝ ᱵᱤᱦᱩᱨᱮᱱ ᱡᱟ ᱜᱚᱸᱥᱟᱭ ᱜᱳᱛᱨᱳᱫ ᱫᱚᱭ ᱥᱟᱸᱦᱮᱫᱟ
ᱟᱪᱩᱨ ᱛᱮᱦᱚᱸ ᱟᱪᱩᱨᱮᱱ ᱡᱟ ᱜᱚᱸᱥᱟᱭ ᱛᱩᱫᱮ ᱫᱚᱭ ᱨᱟᱜᱮ ᱠᱟᱱ
ᱵᱤᱦᱩᱨ ᱛᱮᱦᱚᱸ ᱵᱤᱦᱩᱨᱮᱱ ᱡᱟ ᱜᱚᱸᱥᱟᱭ ᱜᱳᱛᱨᱳᱫ ᱫᱚᱭ
ᱥᱟᱸᱦᱮᱫᱟ᱾
ᱛᱚᱠᱚᱭ ᱢᱮ ᱫᱚᱭ ᱱᱟᱠᱟᱲᱟᱣᱟᱫᱮ ᱡᱟ ᱜᱚᱸᱥᱟᱭ ᱛᱩᱫᱮ ᱫᱚᱭ
ᱨᱟᱜᱮ ᱠᱟᱱ
ᱛᱚᱠᱚᱭ ᱢᱮ ᱫᱚᱭ ᱫᱟᱱᱫᱮᱭᱟᱫᱮ ᱡᱟ ᱜᱚᱸᱥᱟᱭ ᱜᱳᱛᱨᱳᱫ ᱫᱚᱭ
ᱥᱟᱸᱦᱮᱫᱟ᱾
ᱢᱚᱬᱮᱠᱚᱠᱚ ᱱᱟᱠᱟᱲᱟᱣᱟᱫᱮ ᱡᱟ ᱜᱚᱸᱥᱟᱭ ᱛᱩᱫᱮ ᱫᱚᱭ ᱨᱟᱜᱮ
ᱠᱟᱱ
ᱛᱩᱨᱩᱭ ᱠᱚᱠᱚ ᱫᱟᱱᱫᱮᱭᱟᱫᱮ ᱡᱟ ᱜᱚᱸᱥᱟᱭ ᱜᱳᱛᱨᱳᱫ ᱫᱚᱭ
ᱥᱟᱸᱦᱮᱫᱟ᱾”
ᱱᱚᱣᱟᱠᱚ ᱥᱮᱨᱮᱧ ᱨᱮᱱᱟᱜ ᱢᱟᱦᱤᱛ ᱱᱩᱱᱟᱹᱜ ᱢᱚᱡᱽ ᱜᱟᱵᱟᱱᱟ
ᱡᱟᱸᱦᱟᱛᱮ ᱫᱮᱵᱽᱞᱳᱠ ᱠᱷᱚᱱ ᱵᱚᱝᱜᱟᱠᱚ ᱠᱟᱢᱥᱟᱣ ᱟᱲᱜᱚᱱᱟ᱾
ᱵᱚᱝᱜᱟ ᱠᱚ ᱫᱮᱵᱽ ᱞᱳᱠ ᱠᱷᱚᱱ ᱠᱟᱢᱥᱟᱣ ᱟᱲᱜᱚ ᱠᱟᱛᱮ ᱟᱠᱚᱣᱟᱜ
ᱥᱟᱯᱟᱵ ᱠᱚ ᱥᱟᱵᱟ᱾ ᱢᱟᱨᱟᱝ ᱵᱩᱨᱩ ᱫᱚ ᱥᱟᱢᱟᱱᱚᱢ ᱠᱟᱹᱯᱤ,
ᱡᱟᱦᱮᱨ ᱮᱨᱟ ᱫᱚ ᱡᱚᱱᱚᱜ ᱟᱨ ᱢᱚᱬᱮ ᱠᱚ ᱛᱩᱨᱩᱭ ᱠᱚ ᱫᱚ ᱟᱜᱼ
ᱥᱟᱨ᱾ ᱚᱱᱟ ᱛᱟᱭᱚᱢ ᱯᱳᱭᱞᱳ ᱛᱷᱚᱠ ᱨᱮᱱᱟᱜ ᱥᱮᱨᱮᱧ ᱫᱚ ᱼ
“ᱛᱚᱠᱚᱭ ᱢᱮ ᱫᱚᱭ ᱨᱟᱠᱟᱵ ᱮᱱ ᱦᱳ,
ᱚᱛ ᱢᱟ ᱰᱤᱜᱤᱨ ᱰᱤᱜᱤᱨ ᱦᱟᱞᱮ ᱥᱮᱨᱢᱟ ᱵᱟᱨᱟᱝ ᱵᱟᱨᱟᱝᱹᱹᱹ
ᱩᱢ ᱟᱞᱟᱝ ᱦᱳ ᱟᱡᱤᱧ ᱱᱟᱲᱠᱟᱱᱟᱞᱟᱝ ᱦᱳ,
ᱟᱜᱩᱭᱟᱞᱟᱝ ᱦᱳ ᱟᱡᱤᱧ ᱱᱚᱛᱮᱜᱚᱨ ᱦᱟᱥᱟᱹᱹᱹᱹᱹᱹᱹᱹ” ᱮᱢᱟᱱ ᱠᱚ᱾
ᱯᱤᱞᱪᱩ ᱦᱟᱲᱟᱢ ᱯᱤᱞᱪᱩ ᱵᱩᱰᱦᱤ ᱯᱚᱼᱯᱚᱸᱜᱲᱟ ᱟᱨᱦᱚᱸ ᱠᱚ
ᱥᱟᱝᱜᱮ ᱪᱟᱞᱟᱣᱮᱱᱟ᱾ ᱩᱱ ᱚᱠᱛᱮ ᱜᱟᱹᱭ ᱵᱤᱛᱠᱤᱞ ᱞᱮᱠᱟ ᱠᱚ ᱵᱟᱹᱲᱤᱡ
ᱪᱟᱵᱟᱭᱮᱱᱟ, ᱫᱷᱚᱨᱚᱢ ᱠᱚᱨᱚᱢ ᱟᱨᱦᱚᱸ ᱱᱟᱥᱟᱣ ᱪᱟᱞᱟᱣᱮᱱᱟ᱾
ᱩᱱᱨᱮ ᱥᱤᱥᱤᱨᱡᱟᱹᱣᱤᱡ ᱮ ᱰᱟᱠᱮ ᱞᱮᱫ ᱠᱚᱣᱟ, ᱚᱠᱚᱭ ᱜᱮ ᱵᱟᱝᱠᱚ
ᱥᱮᱴᱮᱨ ᱞᱮᱱᱟ᱾ ᱥᱤᱥᱤᱨᱡᱟᱹᱣᱤᱡ ᱨᱟᱹᱜᱤᱛᱮ ᱥᱮᱝᱜᱮᱞ ᱫᱟᱜ ᱮ ᱡᱟᱹᱲᱤ
ᱠᱮᱫᱟ᱾ ᱱᱤᱛ ᱦᱚᱸ ᱥᱮᱨᱮᱧ ᱨᱮ ᱢᱮᱱᱟᱜᱼᱟ
“ᱢᱚᱬᱮ ᱥᱤᱧ ᱢᱚᱬᱮ ᱧᱤᱫᱟᱹ ᱥᱮᱸᱜᱮᱞ ᱫᱟᱜ ᱡᱟᱹᱲᱤ ᱠᱮᱫᱟᱭ ᱦᱳ
ᱢᱚᱬᱮ ᱥᱤᱧ ᱢᱚᱬᱮ ᱧᱤᱫᱟᱹ ᱡᱟᱰᱟᱢ ᱡᱟᱰᱟᱢ ᱦᱳ᱾
ᱢᱚᱬᱮ ᱥᱤᱧ ᱢᱚᱬᱮ ᱧᱤᱫᱟᱹ ᱢᱟᱱᱣᱟ ᱚᱠᱟᱨᱮᱵᱮᱱ ᱛᱟᱸᱦᱮ ᱠᱟᱱᱟ
ᱦᱳ
ᱢᱟᱨᱟᱝ ᱵᱩᱨᱩ ᱠᱮᱨᱟ ᱫᱷᱤᱨᱤ ᱵᱟᱢᱵᱟᱲᱮ ᱡᱟᱦᱮᱨ ᱟᱭᱳ
ᱠᱮᱨᱟ ᱛᱷᱟᱱ ᱨᱮ ᱦᱳ᱾”
ᱩᱱᱨᱮ ᱢᱟᱨᱟᱝ ᱵᱩᱨᱩᱜᱮ ᱥᱚᱛ ᱟᱱ ᱦᱚᱲ ᱫᱚ ᱦᱟᱨᱛᱟ ᱵᱩᱨᱩ
ᱫᱟᱸᱫᱮᱨ ᱨᱮ ᱩᱢᱩᱞᱮ ᱢᱮᱛᱟᱫ ᱠᱚ ᱛᱟᱸᱦᱮᱫ᱾ ᱢᱮᱱᱠᱷᱟᱱ ᱵᱟᱨᱭᱟ
ᱥᱚᱱᱚᱛ ᱡᱩᱨᱤ ᱜᱮᱠᱤᱱ ᱵᱟᱧᱪᱟᱣ ᱞᱮᱱᱟ᱾ ᱟᱫᱚᱢ ᱫᱚᱠᱚ ᱢᱮᱱᱟ
ᱩᱱᱠᱤᱱ ᱜᱮ ᱥᱨᱤ ᱵᱟᱨᱤ ᱥᱮ ᱥᱟᱨᱮᱡ ᱵᱟᱨᱮᱡ᱾ ᱡᱟᱦᱮᱨ ᱮᱨᱟ
ᱜᱮ ᱩᱱᱠᱤᱱᱮ ᱥᱮᱯᱮᱧ ᱞᱮᱫ ᱠᱤᱱᱟ᱾ ᱚᱱᱟ ᱥᱮᱝᱜᱮᱞ ᱫᱟᱜ ᱛᱮ
ᱠᱷᱚᱭ ᱠᱷᱚᱛᱤ ᱨᱮᱱᱟᱜ ᱵᱚᱨᱱᱚᱱ ᱱᱤᱛ ᱦᱚᱸ ᱥᱮᱨᱮᱧ ᱛᱟᱞᱟᱛᱮ
ᱚᱬᱦᱮᱸᱜ ᱜᱮᱭᱟ ᱼ
“ᱵᱩᱨᱩ ᱢᱟ ᱪᱮᱛᱟᱱᱨᱮ ᱨᱟᱭᱢᱟ ᱠᱟᱸᱲᱠᱮ ᱫᱚ
ᱦᱟᱨᱟᱢᱟ ᱞᱟᱛᱟᱨ ᱨᱮ ᱵᱷᱸᱤᱫᱟᱹᱲᱮᱱ ᱵᱤᱛᱠᱤᱞ
ᱫᱳᱥᱮ ᱪᱷᱤᱛᱟᱹ ᱦᱳ ᱪᱤᱨᱤᱜᱚᱲ ᱟᱜᱩᱭᱮᱢ
ᱫᱳᱥᱮ ᱪᱷᱤᱛᱟᱹ ᱦᱳ ᱪᱤᱭᱟᱹᱜᱚᱨ ᱟᱜᱩᱭᱮᱢ᱾
ᱪᱤᱭᱟᱹᱢᱟᱧ ᱪᱤᱭᱟᱹᱠᱮᱫᱮ ᱨᱟᱭᱢᱟ ᱠᱟᱸᱲᱠᱮ ᱫᱚ
ᱪᱤᱭᱟᱹᱢᱟᱧ ᱪᱤᱭᱟᱹᱠᱮᱫᱮ ᱵᱷᱤᱸᱫᱟᱹᱲᱮᱱ ᱵᱤᱛᱠᱤᱞ᱾
ᱦᱩᱨᱩᱢᱮ ᱦᱩᱨᱩᱢᱮ ᱨᱟᱭ ᱢᱟ ᱠᱟᱸᱲᱠᱮ ᱫᱚ
ᱰᱤᱜᱤᱨᱮ ᱰᱤᱜᱤᱨᱮ ᱵᱷᱤᱸᱫᱟᱹᱲᱮᱱ ᱵᱤᱛᱠᱤᱞ᱾”
ᱩᱱᱠᱤᱱ ᱥᱟᱨᱮᱡ ᱵᱟᱨᱮᱡ ᱥᱚᱱᱚᱛ ᱡᱩᱨᱤ ᱠᱤᱱ ᱥᱚᱝᱥᱟᱨ
ᱨᱮᱱᱟᱜ ᱫᱷᱚᱨᱚᱢ ᱠᱤᱱ ᱯᱟᱞᱚᱱ ᱞᱮᱫᱟ᱾ ᱟᱫᱚᱢ ᱫᱚᱠᱚ ᱢᱮᱱᱟ
ᱥᱨᱤ ᱵᱟᱨᱤ᱾ ᱩᱱᱠᱤᱱᱟᱜ ᱥᱚᱛ ᱠᱟᱢᱤᱛᱮ ᱥᱤᱨᱡᱚᱱ ᱵᱟᱧᱪᱟᱣ
ᱞᱮᱱᱛᱮ ᱱᱤᱛ ᱦᱚᱸ ᱩᱱᱠᱤᱱ ᱫᱤᱥᱟᱹ ᱠᱟᱛᱮ ᱪᱷᱟᱢᱰᱟ ᱞᱟᱛᱟᱨ ᱨᱮ
ᱡᱚᱲ ᱥᱟᱜᱩᱱ ᱴᱷᱤᱞᱤ ᱵᱚᱱ ᱫᱚᱲᱚᱢᱟ᱾ ᱥᱚᱱᱚᱛ ᱡᱩᱨᱤ ᱠᱤᱱ ᱨᱮᱱ
ᱯᱚᱼᱯᱚᱸᱜᱽᱲᱟ ᱦᱚᱸ ᱟᱰᱤ ᱜᱟᱱᱠᱚ ᱵᱟᱹᱲᱛᱤᱭᱮᱱᱟ᱾ ᱜᱮᱞ ᱵᱟᱨ
ᱜᱚᱴᱟᱝ ᱯᱟᱨᱤᱥ ᱠᱚ ᱦᱳᱭᱮᱱᱟ᱾ ᱜᱮᱞ ᱵᱟᱨ ᱯᱟᱨᱤᱥ ᱫᱚ ᱱᱚᱝᱠᱟᱼ
ᱦᱟᱸᱥᱫᱟ, ᱢᱩᱨᱢᱩ, ᱥᱚᱨᱮᱱ, ᱠᱤᱥᱠᱩ, ᱢᱟᱱᱰᱤ, ᱦᱮᱢᱵᱽᱨᱚᱢ,
ᱴᱩᱰᱩ, ᱵᱟᱥᱠᱮᱹ, ᱵᱮᱥᱨᱟ, ᱯᱟᱸᱣᱨᱤᱭᱟ, ᱪᱚᱸᱬᱮ ᱟᱨ ᱰᱚᱸᱰᱠᱟ᱾
ᱱᱩᱠᱩ ᱫᱚ ᱥᱟᱥᱟᱝ ᱵᱮᱰᱟ ᱨᱮᱠᱚ ᱯᱟᱨᱤᱥ ᱮᱱᱟ᱾ ᱯᱤᱞᱪᱩ ᱦᱟᱲᱟᱢ
ᱯᱤᱞᱪᱩ ᱵᱩᱰᱦᱤ ᱡᱚᱠᱷᱮᱡ ᱮᱭᱟᱭ ᱯᱟᱨᱤᱥ ᱠᱚ ᱛᱟᱸᱦᱮ ᱞᱮᱱᱟ
ᱱᱤᱛᱚᱜ ᱵᱟᱥᱠᱮᱹ, ᱵᱮᱨᱥᱟ, ᱪᱚᱸᱬᱮ, ᱯᱟᱸᱣᱨᱤᱭᱟ ᱟᱨ ᱰᱚᱸᱰᱠᱟ
ᱟᱛᱮ ᱜᱮᱞᱵᱟᱨ ᱯᱟᱨᱤᱥ ᱵᱚᱱ ᱦᱳᱭ ᱮᱱᱟ᱾ ᱤᱱᱟᱹᱛᱮ ᱢᱟᱨᱮ
ᱥᱮᱨᱮᱧᱨᱮ ᱱᱤᱛ ᱦᱚᱸ ᱞᱟᱭᱚᱜᱼᱟ ᱼ
”ᱦᱤᱦᱤᱲᱤ ᱯᱤᱯᱤᱲᱤ ᱨᱮᱵᱚᱱ ᱡᱟᱱᱟᱢ ᱞᱮᱱ
ᱠᱷᱳᱡᱽ ᱠᱷᱟᱢᱟᱱ ᱨᱮᱵᱚᱱ ᱠᱷᱳᱡᱽ ᱞᱮᱱ᱾
ᱦᱟᱨᱛᱟ ᱨᱮᱵᱚᱱ ᱦᱟᱨᱟ ᱞᱮᱱ
ᱥᱟᱥᱟᱝ ᱵᱮᱰᱟ ᱨᱮᱵᱚᱱ ᱡᱟᱹᱛ ᱞᱮᱱᱟ ᱦᱳ᱾”
ᱥᱟᱥᱟᱝ ᱵᱮᱰᱟ ᱨᱮ ᱦᱚᱸ ᱛᱷᱟᱭ ᱛᱷᱤᱛᱤ ᱫᱚ ᱵᱮᱥᱤ ᱫᱤᱱ
ᱵᱟᱝ ᱛᱟᱸᱦᱮ ᱞᱮᱱᱟ ᱱᱚᱸᱰᱮ ᱠᱷᱚᱱ ᱦᱚᱸ ᱥᱤᱧ ᱫᱩᱣᱟᱹᱨ ᱵᱟᱹᱭ
ᱫᱩᱣᱟᱹᱨ ᱯᱟᱨᱚᱢ ᱠᱟᱛᱮ ᱪᱟᱢᱯᱟ ᱛᱮᱵᱚᱱ ᱦᱮᱡ ᱮᱱᱟ᱾ ᱪᱟᱢᱯᱟ
ᱨᱮᱜᱮ ᱟᱵᱚᱣᱟᱜ ᱜᱟᱲ ᱫᱚ ᱵᱮᱱᱟᱣ ᱞᱮᱱᱟ ᱦᱮᱢᱵᱽᱨᱚᱢ ᱠᱚᱣᱟᱜ
ᱠᱷᱟᱭᱨᱤ ᱜᱟᱲ, ᱠᱤᱥᱠᱩ ᱠᱚᱣᱟᱜ ᱠᱚᱸᱭᱰᱟ ᱜᱟᱲ, ᱢᱩᱨᱢᱩ ᱠᱚᱣᱟᱜ
ᱪᱟᱢᱯᱟ ᱜᱟᱲ, ᱵᱟᱫᱚᱞᱤ ᱜᱟᱲ ᱫᱚ ᱢᱟᱱᱰᱤ ᱠᱚᱣᱟᱜ, ᱥᱤᱢ
ᱜᱟᱲ ᱴᱩᱰᱩ ᱠᱚᱣᱟᱜ, ᱴᱟᱹᱴᱤᱡᱷᱟᱹᱨᱤ ᱜᱟᱲ ᱫᱚ ᱦᱟᱸᱥᱫᱟ ᱠᱚᱣᱟᱜ,
ᱥᱚᱨᱮᱱ ᱠᱚᱣᱟᱜ ᱫᱚ ᱜᱟᱲ ᱵᱟᱱᱩᱜᱼᱟ ᱢᱮᱱᱟᱜ ᱛᱟᱠᱚᱣᱟ
ᱵᱟᱪᱷᱨᱤ ᱦᱟᱯᱟ᱾ ᱱᱤᱛ ᱦᱚᱸ ᱤᱱᱟᱹᱛᱮ ᱥᱮᱨᱮᱧ ᱨᱮᱵᱚᱱ ᱚᱬᱲᱦᱮᱭ
ᱜᱮᱭᱟ ᱺᱼ
ᱞᱤᱞᱤ ᱵᱤᱪᱷᱤ ᱪᱟᱭ ᱜᱟᱲ ᱞᱤᱠᱷᱚᱱ ᱜᱚᱲᱦᱚᱱ ᱪᱟᱢᱯᱟ
ᱜᱟᱲ
ᱫᱟᱭᱟᱜᱮ ᱜᱟᱲ ᱵᱚᱱ ᱵᱟᱜᱤᱭᱟᱫᱟ᱾
ᱪᱟᱢᱯᱟ ᱨᱮᱜᱮ ᱥᱟᱱᱛᱟᱲ ᱫᱚ ᱟᱰᱤ ᱥᱩᱞᱩᱠ ᱛᱮᱵᱚᱱ ᱛᱟᱸᱦᱮ
ᱠᱟᱱ ᱨᱮᱦᱚᱸ ᱨᱤᱞᱟᱹᱢᱟᱞᱟ ᱦᱟᱹᱨᱤᱭᱟᱹᱲ ᱨᱚᱲ ᱞᱟᱸᱫᱟ ᱫᱚ ᱢᱚᱥᱚᱫ
ᱮᱱᱟ᱾ ᱱᱚᱸᱰᱮ ᱫᱷᱟᱵᱤᱡ ᱜᱮ ᱟᱵᱚ ᱠᱷᱮᱨᱚᱣᱟᱞ ᱫᱚ ᱡᱩᱢᱤᱫ ᱥᱮ
ᱢᱤᱫ ᱜᱟᱸᱰᱳ ᱢᱤᱫ ᱢᱟᱹᱪᱤ ᱵᱚᱱ ᱛᱟᱸᱦᱮ ᱞᱮᱱᱟ ᱢᱩᱱᱰᱟᱹ, ᱢᱟᱦᱞᱮ,
ᱚᱨᱟᱸᱶ, ᱵᱤᱨᱦᱚᱲ ᱥᱟᱞᱟᱜ ᱥᱟᱱᱛᱟᱲ, ᱢᱟᱦᱞᱮ, ᱢᱩᱱᱰᱟᱹ ᱤᱱᱟᱹᱜ
ᱛᱮ ᱟᱵᱚ ᱫᱚ ᱠᱷᱮᱨᱣᱟᱞ᱾ ᱪᱟᱢᱯᱟ ᱨᱮᱜᱮ ᱚᱠᱚᱭ ᱫᱚ ᱨᱟᱯᱟᱡᱽ,
ᱚᱠᱚᱭ ᱫᱚ ᱱᱟᱭᱠᱮ, ᱚᱠᱚᱭ ᱫᱚ ᱥᱤᱯᱟᱹᱦᱤ, ᱚᱠᱚᱭ ᱫᱚ ᱨᱩᱥᱤᱠᱟ
ᱱᱚᱝᱠᱟ ᱵᱚ ᱛᱟᱸᱦᱮ ᱞᱮᱱᱟ᱾ ᱦᱚᱨᱚᱯᱯᱟ ᱥᱚᱵᱷᱚᱛᱟ ᱨᱮᱱᱟᱜ
ᱟᱹᱰᱤ ᱜᱚᱴᱟᱝ ᱟᱹᱨᱤᱪᱟᱹᱞᱤ ᱪᱟᱢᱯᱟ ᱨᱮᱱ ᱟᱹᱫᱤᱵᱟᱹᱥᱤ ᱠᱚᱣᱟᱜ
ᱟᱹᱨᱤᱪᱟᱹᱞᱤ ᱥᱟᱝ ᱢᱤᱫ ᱜᱮᱭᱟ ᱡᱩᱫᱤᱭᱚ ᱱᱟᱜᱟᱢ ᱨᱮᱱᱟᱜ
ᱥᱚᱵᱷᱚᱛᱟ ᱞᱮᱠᱟᱛᱮ ᱵᱚᱱ ᱧᱮᱞᱟ ᱦᱚᱨᱚᱯᱯᱟ ᱥᱚᱵᱷᱚᱛᱟ
ᱪᱟᱢᱯᱟ ᱥᱚᱵᱷᱚᱛᱟ ᱢᱮᱱ ᱫᱚ ᱵᱟᱝ ᱵᱷᱩᱞᱟ᱾ ᱱᱟᱜᱟᱢᱤᱭᱟᱹ
ᱠᱚ ᱢᱮᱱᱮᱫᱟ ᱦᱚᱨᱚᱯᱯᱟ ᱥᱚᱵᱷᱚᱛᱟ ᱫᱚ ᱠᱷᱨᱤᱥᱴ ᱞᱟᱦᱟ
᱒᱓᱐᱐ ᱥᱟᱞ ᱨᱮᱱᱟᱜ ᱟᱨ ᱟᱨᱡᱚ ᱠᱚ ᱵᱷᱟᱨᱚᱛ ᱫᱤᱥᱚᱢ ᱛᱮᱠᱚ
ᱵᱚᱞᱚᱣᱟᱠᱟᱱᱟ ᱠᱷᱨᱤᱥᱴ ᱞᱟᱦᱟ ᱑᱕᱐᱐ ᱨᱮ᱾ ᱪᱟᱢᱯᱟ ᱨᱮᱦᱚᱸ
ᱟᱵᱚᱣᱟᱜ ᱦᱤᱥᱠᱟᱹ ᱦᱩᱞᱩᱝ ᱨᱮᱱᱟᱜ ᱪᱤᱛᱟᱹᱨ ᱫᱚ ᱢᱟᱨᱮ ᱚᱬᱦᱮ
ᱵᱚᱱ ᱚᱬᱦᱮᱭ ᱜᱮᱭᱟ ᱼ
“ᱤᱪᱟᱹᱜ ᱵᱟᱦᱟ ᱥᱟᱨ ᱛᱮᱠᱚ ᱛᱩᱯᱩᱧ ᱠᱟᱱᱟ
ᱜᱟᱝ ᱱᱟᱹᱭᱨᱮ ᱢᱟᱱᱟ ᱥᱩᱲᱟᱹ ᱱᱟᱹᱭᱨᱮ
ᱢᱩᱨᱩᱫ ᱵᱟᱦᱟ ᱠᱟᱹᱯᱤ ᱛᱮᱠᱚ ᱢᱟᱯᱟᱜ ᱠᱟᱱᱟ
ᱜᱟᱝ ᱱᱟᱹᱭᱨᱮ ᱢᱟᱱᱟ ᱥᱩᱲᱟᱹ ᱱᱟᱹᱭᱨᱮ᱾
ᱠᱚᱸᱭᱰᱟ ᱠᱚᱠᱚ ᱢᱟᱯᱟᱜ ᱠᱟᱱᱟ
ᱜᱟᱝ ᱱᱟᱹᱭᱨᱮ ᱢᱟᱱᱟ ᱥᱩᱲᱟᱹ ᱱᱟᱹᱭᱨᱮ᱾
ᱵᱟᱫᱚᱞᱤ ᱠᱚᱠᱚ ᱛᱩᱯᱩᱧ ᱠᱟᱱᱟ
ᱜᱟᱝ ᱱᱟᱹᱭᱨᱮ ᱢᱟᱱᱟ ᱥᱩᱲᱟᱹ ᱱᱟᱹᱭᱨᱮ᱾
ᱥᱤᱢᱟᱹ ᱞᱟᱜᱤᱫ ᱠᱚ ᱢᱟᱯᱟᱜ ᱠᱟᱱᱟ
ᱜᱟᱝ ᱱᱟᱹᱭᱨᱮ ᱢᱟᱱᱟ ᱥᱩᱲᱟᱹ ᱱᱟᱹᱭᱨᱮ᱾
ᱥᱟᱲᱮ ᱞᱟᱜᱤᱫ ᱠᱚ ᱢᱟᱯᱟᱜ ᱠᱟᱱᱟ
ᱜᱟᱝ ᱱᱟᱹᱭᱨᱮ ᱢᱟᱱᱟ ᱥᱩᱲᱟᱹ ᱱᱟᱹᱭᱨᱮ᱾”
ᱱᱚᱣᱟ ᱪᱟᱢᱯᱟ ᱫᱤᱥᱚᱢ ᱨᱮᱫᱚ ᱢᱟᱨᱟᱝ ᱵᱩᱨᱩ, ᱡᱟᱦᱮᱨ
ᱮᱨᱟ, ᱢᱚᱬᱮᱠᱚ ᱛᱩᱨᱩᱭ ᱠᱚ ᱠᱩᱞᱦᱤ ᱢᱩᱪᱟᱹᱫ ᱨᱮᱵᱚᱱ ᱫᱚᱦᱚ
ᱞᱮᱫ ᱠᱚᱣᱟ ᱯᱤᱲᱤ ᱯᱤᱲᱤ ᱫᱮᱵᱟ ᱥᱮᱵᱟ ᱛᱟᱞᱟᱛᱮ᱾ ᱪᱟᱢᱯᱟ
ᱫᱤᱥᱚᱢ ᱵᱟᱹᱜᱤ ᱠᱟᱛᱮ ᱛᱚᱲᱮᱜᱚᱲ ᱯᱳᱠᱷᱳᱨᱤ ᱵᱟᱦᱟ
ᱵᱟᱸᱫᱮᱞᱟᱨᱮ ᱦᱟᱯᱲᱟᱢ ᱠᱚ ᱵᱟᱦᱟ ᱠᱚ ᱵᱚᱝᱜᱟᱭᱮᱱᱟ, ᱞᱟᱭ
ᱞᱟᱜᱪᱟᱨ ᱯᱟᱺᱭᱲᱤ ᱛᱚᱞᱮᱱᱟ᱾ ᱚᱛᱱᱚᱜᱤᱭᱟᱹ ᱥᱤᱢᱟᱹ ᱟᱲᱮ
ᱦᱟᱴᱤᱧ ᱮᱱᱟ᱾ ᱵᱟᱦᱟ ᱢᱟᱜ ᱢᱚᱲᱮ ᱡᱚᱛᱚ ᱫᱤᱥᱚᱢ ᱨᱮᱜᱮ
ᱪᱟᱨᱪᱟᱣᱮᱱᱟ᱾
ᱢᱩᱪᱟᱹᱫ ᱨᱮ ᱞᱟᱹᱭ ᱡᱟᱨᱩᱲᱟ ᱚᱛᱱᱚᱜᱤᱭᱟᱹ ᱥᱤᱢᱟᱹ ᱥᱟᱲᱮ
ᱦᱟᱴᱤᱧ ᱠᱟᱛᱮ ᱜᱮ ᱢᱟᱜ ᱢᱚᱲᱮ ᱨᱮᱱᱟᱜ ᱪᱟᱨᱪᱟᱣ ᱫᱚ ᱮᱦᱚᱵ
ᱮᱱᱟ᱾ ᱢᱤᱫ ᱴᱟᱝ ᱞᱟᱹᱭ ᱛᱮᱱᱟᱜ ᱫᱚ ᱢᱟᱜ ᱢᱚᱲᱮ ᱡᱚᱛᱚ
ᱯᱟᱥᱱᱟᱜᱼᱟ ᱵᱟᱦᱟ ᱨᱮᱱᱟᱜ ᱡᱳᱣᱞᱩᱥ ᱫᱚ ᱠᱚᱢᱚᱜᱼᱟ᱾ ᱤᱱᱟᱹᱛᱮ
ᱱᱤᱛᱚᱜ ᱡᱟᱹᱨᱩᱲᱟ ᱵᱟᱦᱟ ᱟᱨ ᱢᱟᱜ ᱢᱚᱲᱮ ᱨᱮ ᱪᱟᱸᱫᱳ ᱢᱩᱦᱤᱢ
ᱥᱮᱨᱮᱧ ᱜᱮ ᱮᱱᱮᱡ ᱟᱠᱷᱲᱟᱭ ᱥᱟᱠᱷᱤ ᱥᱚᱵᱷᱟᱭ ᱢᱟ᱾ ᱚᱠᱛᱚ
ᱵᱚᱫᱚᱞ ᱥᱟᱸᱶ ᱥᱟᱸᱶᱛᱮ ᱚᱠᱛᱚ ᱦᱚᱸ ᱯᱟᱛᱟ ᱯᱚᱨᱚᱵᱽ ᱨᱮ᱾
No comments:
Post a Comment