ᱫᱷᱟᱹᱨᱛᱤ ᱯᱩᱨᱤ ᱥᱤᱨᱡᱚᱱ

ᱦᱟᱯᱲᱟᱢ ᱠᱚᱣᱟᱜ ᱠᱟᱛᱷᱟ ᱞᱮᱠᱟᱛᱮ ᱟᱹᱜᱤᱞ ᱨᱮᱱᱟᱜ ᱯᱟᱹᱦᱤᱞ ᱡᱩᱜᱽ ᱨᱮᱫᱳ ᱱᱚᱶᱟ ᱫᱷᱟᱨᱛᱤ ᱯᱩᱨᱤ ᱨᱮᱫᱚ ᱡᱤᱵ ᱡᱤᱭᱟᱹᱞᱤ ᱪᱤᱞᱤ ᱦᱚᱸ ᱵᱟᱠᱚ  ᱛᱟᱦᱮᱸ ᱠᱟᱱᱟ᱾ ᱩᱱ ᱡᱚᱦᱚᱜ ᱫᱚ ᱜᱚᱴᱟ ᱯᱟᱲᱟ ᱠᱟᱬᱟᱝ ᱧᱩᱛᱟᱛ ᱜᱮ ᱛᱟᱦᱮᱸ ᱠᱟᱱᱟ᱾ ᱚᱱᱟ ᱠᱟᱬᱟᱝ ᱧᱩᱛᱟᱛ ᱦᱚᱭ ᱠᱷᱳᱞ ᱨᱮ ᱢᱤᱫ ᱜᱚᱴᱟᱝ ᱥᱟᱵᱟᱜᱤ ᱫᱤᱞ ᱫᱟᱲᱮ ᱛᱟᱦᱮᱸ ᱠᱟᱱᱟ ᱾ ᱱᱩᱭ ᱫᱤᱞ ᱫᱟᱲᱮ ᱱᱚᱸᱰᱮ ᱟᱡᱟᱜ ᱡᱟᱦᱟᱸᱨᱟ ᱩᱫᱩᱜ ᱞᱟᱹᱜᱤᱫ ᱟᱹᱰᱤ ᱟᱹᱪ ᱯᱟᱸᱪ ᱠᱟᱛᱮ ᱠᱩᱨᱩ ᱢᱩᱴᱩ ᱟᱛᱮ ᱟᱡᱟᱜ ᱫᱟᱲᱮ ᱵᱟᱦᱟ ᱵᱷᱩᱴᱟᱹᱜ ᱮᱱᱟ᱾

    ᱟᱫᱚ ᱚᱱᱟ ᱫᱟᱲᱮ ᱱᱚᱝᱠᱟ ᱠᱩᱨᱩ ᱢᱩᱴᱩ ᱵᱟᱲᱟ ᱠᱟᱛᱮ ᱞᱟᱲᱟᱣ ᱮᱱᱟᱭ᱾ ᱞᱟᱲᱟᱣᱼᱞᱟᱲᱟᱣ ᱛᱮ ᱡᱚᱠᱷᱚᱱ ᱥᱮᱸᱜᱮᱞ ᱞᱮᱠᱟᱭ ᱞᱚᱞᱚ ᱤᱫᱤ ᱮᱱᱟ᱾ ᱟᱡᱟᱜ ᱚᱱᱟ ᱮᱞᱟᱝ ᱫᱟᱲᱮ ᱥᱟᱱᱟᱢ ᱯᱟᱠᱟᱲ ᱛᱟᱨᱥᱮ ᱮᱱᱟ ᱟᱨ ᱚᱱᱟ ᱦᱚᱭ ᱜᱚᱴᱟ ᱯᱟᱲᱟ ᱫᱟᱹᱲ ᱟᱹᱩᱪᱨ ᱪᱩᱢᱟᱹᱬᱟ ᱜᱩᱨᱞᱟᱹᱼᱜᱩᱨᱞᱤ ᱵᱟᱹᱨᱰᱩ ᱞᱮᱠᱟ ᱫᱩᱨᱼᱫᱩᱨᱟᱹᱣ ᱟᱹᱪᱩᱨ ᱮᱱᱟ ᱾ ᱟᱫᱚ ᱚᱱᱟ ᱜᱷᱩᱨᱱᱤ ᱛᱟᱞᱟ ᱠᱦᱚᱱ ᱜᱮ ᱢᱤᱫ ᱵᱚᱝᱜᱟᱭ  ᱚᱢᱚᱱ ᱮᱱᱟ ᱢᱮᱱᱮᱠ “ᱥᱤᱥᱤᱨ ᱡᱟᱹᱣᱤᱡ” ᱾

    ᱟᱰᱚ ᱤᱱᱤ ᱵᱚᱝᱜᱟ ᱥᱩᱱ ᱟᱨ ᱧᱩᱛ ᱨᱮᱜᱮ ᱛᱷᱤᱨ ᱛᱷᱟᱨ ᱡᱟᱹᱯᱤᱫ ᱟᱪᱮᱛ ᱨᱮᱜᱮ ᱛᱟᱦᱮᱸ ᱟᱠᱟᱭ ᱛᱟᱦᱮᱸ ᱮᱱᱟ᱾ ᱢᱤᱫ ᱫᱤᱱ ᱫᱚ ᱟᱪᱠᱟ ᱜᱮ ᱢᱚᱱᱮ ᱨᱤᱪ ᱨᱟᱹᱥᱠᱟ ᱛᱮ ᱫᱷᱟᱹᱨᱛᱤ ᱯᱩᱨᱤ ᱵᱮᱱᱟᱣ ᱞᱟᱹᱜᱤᱫ ᱠᱩᱠᱢᱩ ᱞᱮᱠᱟ ᱯᱩᱞᱩᱜᱼᱯᱩᱞᱩᱜ ᱟᱫᱷᱟ ᱵᱷᱟᱣ ᱢᱤᱫᱴᱟᱝ ᱟᱹᱰᱤ ᱢᱟᱦᱬᱟ ᱫᱩᱨᱤᱵ ᱮ ᱧᱮᱞ ᱧᱟᱢ ᱠᱮᱜᱼᱟᱭ᱾ ᱟᱫᱚ ᱛᱚᱢ ᱠᱦᱚᱱᱟᱜ ᱮ ᱚᱝ ᱜᱚᱫ ᱮᱱᱟ᱾ ᱠᱷᱟᱱ ᱜᱮ ᱱᱚᱸᱠᱟᱱ ᱫᱟᱲᱮ ᱦᱮᱡ ᱟᱰᱮᱭᱟ ᱟᱡ ᱦᱚᱸ ᱟᱡ ᱵᱟᱭ ᱧᱮᱞ ᱧᱟᱢ ᱞᱮᱱᱟ ᱾ ᱚᱱᱟ ᱫᱟᱲᱮ ᱫᱚ ᱵᱟᱨ ᱦᱟᱹᱴᱤᱧ ᱨᱮ ᱦᱟᱹᱴᱤᱧ ᱮᱱᱟ ᱾ ᱢᱤᱫ ᱫᱚ ᱢᱟᱨᱟᱝ ᱵᱩᱨᱩ ᱟᱨ ᱢᱤᱫ ᱫᱚ ᱡᱟᱦᱮᱨ ᱟᱭᱳ᱾ ᱱᱩᱠᱤᱱ ᱵᱨᱟᱭᱟ ᱵᱚᱸᱜᱟ ᱢᱟᱨᱟᱝ ᱵᱩᱨᱩ ᱟᱨ ᱡᱟᱦᱮᱨ ᱮᱨᱟ ᱦᱚᱭ ᱫᱟᱲᱮ ᱛᱮ ᱥᱮᱨᱢᱟ ᱯᱩᱨᱤ ᱨᱮ ᱵᱟᱝ ᱧᱮᱧᱮᱞ ᱫᱟᱲᱮ ᱞᱮᱠᱟ ᱜᱷᱩᱨᱼᱜᱷᱩᱨᱟᱹᱣ ᱜᱩᱨᱞᱟᱹᱣ ᱟᱹᱪᱩᱨ ᱮᱱᱟ ᱠᱤᱱ᱾

ᱥᱮᱨᱢᱟ ᱨᱮ ᱨᱤᱢᱤᱞ ᱫᱟᱜ ᱡᱮᱢᱚᱱ ᱛᱟᱯᱟᱠᱤᱡ ᱞᱮᱱ ᱠᱷᱟᱱ ᱞᱟᱦᱟᱛᱮ ᱵᱤᱡᱽᱞᱤ ᱧᱮᱞ ᱧᱟᱢᱚᱜᱼᱟ᱾ ᱟᱨ ᱦᱩᱰᱩᱨ ᱥᱟᱰᱮ ᱟᱲᱟᱝ ᱥᱟᱰᱮᱭᱮᱱᱟ ᱚᱱᱟ ᱛᱟᱭᱚᱢ ᱫᱟᱜ ᱮ ᱡᱟᱹᱲᱤᱭᱟ ᱾ ᱚᱱᱠᱟ ᱜᱮ ᱱᱩᱠᱤᱱ ᱵᱚᱸᱜᱟ ᱮᱛᱚᱢ ᱟᱨ ᱠᱚᱭᱮᱸ ᱠᱦᱚᱱᱟᱜ ᱟᱹᱪᱩᱨᱼᱟᱹᱪᱩᱨ ᱡᱚᱦᱚᱜ ᱛᱟᱹᱠᱤᱡ ᱛᱟᱯᱟᱠᱤᱡ ᱞᱮᱱᱟᱠᱤᱱ᱾ ᱟᱨ ᱵᱤᱡᱽᱞᱤ ᱵᱤᱞᱤᱫ ᱵᱤᱞᱤᱫ ᱢᱟᱨᱥᱟᱞ ᱟᱨ ᱦᱩᱰᱩᱨ ᱥᱟᱰᱮ ᱞᱮᱱᱟ᱾

ᱚᱢᱚᱱ ᱮᱱᱟᱠᱚ ᱾ ᱟᱫᱚ ᱟᱯᱟᱱᱼᱟᱯᱤᱱ ᱡᱟᱭᱜᱟ ᱨᱮ ᱛᱟᱦᱮᱸ ᱠᱟᱛᱮ ᱟᱹᱩᱪᱨ ᱟᱠᱟᱜᱮ ᱢᱮᱱᱟᱜ ᱠᱚᱣᱟ᱾ ᱟᱫᱷᱟᱱ ᱠᱚᱣᱟᱜ ᱥᱮᱸᱜᱮ     ᱳᱱᱟ ᱵᱤᱡᱽᱞᱤ ᱵᱤᱞᱤᱫ ᱵᱟᱹᱨᱰᱩ ᱦᱩᱰᱩᱨ ᱥᱟᱰᱮ ᱛᱟᱞᱟ ᱠᱦᱚᱱ ᱜᱮ ᱥᱤᱧ ᱪᱟᱸᱫᱳ, ᱫᱷᱟᱹᱨᱛᱤ ᱯᱩᱨᱤ , ᱧᱤᱫᱟᱹ ᱪᱟᱸᱫᱳ, ᱤᱯᱤᱞ ᱮᱸᱜᱮᱞ ᱮᱢᱟᱱ ᱠᱚ ᱞ ᱞᱚᱞᱚ ᱫᱚ ᱨᱟᱲᱮᱡ ᱟᱠᱟᱱᱟ ᱾ ᱚᱱᱟᱛᱮ ᱥᱤᱧ ᱟᱨ ᱧᱤᱫᱟᱹ ᱷᱩᱭᱩᱜ ᱠᱟᱱᱟ᱾

    ᱥᱤᱨᱡᱚᱱ ᱮᱱᱟ ᱥᱚᱨᱚᱜ ᱯᱩᱨᱤ, ᱢᱚᱧᱪᱚᱯᱩᱨᱤ, ᱫᱷᱟᱹᱨᱛᱤ ᱯᱩᱨᱤ ᱟᱨ ᱯᱟᱛᱟᱞ ᱯᱩᱨᱤ!

ᱫᱚᱥᱟᱨ ᱫᱷᱟᱹᱨᱛᱤ ᱯᱩᱨᱤ ᱥᱤᱨᱡᱚᱱ

    ᱥᱮᱫᱟᱭ ᱟᱹᱜᱤᱞ ᱦᱟᱯᱲᱟᱢ ᱠᱚᱣᱟᱜ ᱵᱤᱨᱟᱹᱫᱟᱞᱤ ᱠᱚᱣᱟᱜ ᱠᱟᱛᱷᱟ ᱞᱮᱠᱟᱛᱮ ᱪᱮ ᱩᱭᱦᱟᱹᱨ ᱵᱷᱟᱹᱵᱤᱛ ᱠᱟᱛᱷᱟ ᱞᱮᱠᱟᱛᱮ ᱯᱟᱹᱦᱤᱞ ᱢᱮᱱᱛᱮ ᱫᱚ ᱟᱹᱫᱽ ᱨᱮ ᱡᱟᱦᱟᱸ ᱫᱷᱟᱹᱨᱛᱤ ᱛᱟᱦᱮᱸ ᱠᱟᱱᱟ ᱚᱱᱟ ᱨᱮ ᱫᱟᱜ ᱵᱟᱝ ᱛᱟᱦᱮᱸ ᱠᱟᱱᱟ᱾ ᱫᱟᱜ ᱵᱟᱹᱱᱩᱜ ᱠᱦᱟᱹᱛᱤᱨ ᱴᱷᱟᱹᱠᱩᱨ ᱫᱮᱵᱽᱼᱫᱮᱵᱟᱞᱚᱠᱚ ᱫᱷᱟᱹᱨᱛᱤ ᱨᱮ ᱠᱩᱧ ᱞᱟ ᱠᱚ ᱨᱤᱠᱟᱹ ᱠᱮᱫᱟ᱾ ᱚᱱᱟ ᱨᱮ ᱟᱴᱟᱞᱼᱟᱴᱟᱞ ᱫᱷᱤᱨᱤ ᱠᱚ ᱞᱟ ᱯᱟᱨᱚᱢ ᱠᱮᱫᱟ᱾ ᱢᱮᱱᱠᱷᱟᱱ ᱫᱟᱜ ᱜᱮ ᱵᱟᱝ ᱥᱮᱛᱮᱝ ᱞᱮᱱᱟ, ᱵᱚᱝᱜᱟ ᱠᱚ ᱪᱟᱶᱨᱤᱭᱟ ᱢᱮᱞᱟ ᱨᱮ ᱵᱤᱪᱟᱨ ᱜᱚᱴᱟ ᱠᱮᱫᱟ ᱢᱟᱨᱟᱝ ᱵᱩᱨᱩᱣᱟᱜ ᱵᱟᱨᱹᱪᱷᱤ ᱦᱟᱯᱟ ᱚᱱᱟ ᱪᱟᱹᱴᱟᱹᱱᱤ ᱟᱴᱟᱞ ᱫᱷᱤᱨᱤ ᱨᱮ ᱡᱚᱥ ᱠᱟᱛᱮ ᱜᱚᱡᱚᱢᱚᱛᱤ ᱦᱟᱹᱛᱤᱠᱚ ᱞᱮᱵᱮᱫ ᱚᱪᱚ ᱠᱮᱫᱮᱭᱟ ᱾ ᱚᱱᱟ ᱟᱴᱟᱞ ᱫᱷᱤᱨᱤ ᱵᱷᱩᱜᱟᱜ ᱠᱟᱛᱮ ᱫᱷᱟᱹᱨᱛᱤ ᱵᱷᱤᱛᱨᱤ ᱠᱷᱳᱱ ᱫᱟᱜ ᱵᱦᱚᱠᱟᱣ ᱵᱦᱚᱠᱟᱣ ᱚᱲᱚᱠᱮᱱᱟ, ᱚᱱᱠᱟᱞᱮᱠᱟᱛᱮ ᱫᱷᱟᱹᱨᱛᱤ ᱫᱚ ᱡᱚᱞᱟ ᱯᱩᱨᱤ ᱞᱮᱱᱟ᱾

ᱡᱚᱠᱷᱚᱱ ᱦᱟᱺᱥ ᱦᱟᱺᱥᱞᱤ ᱵᱤᱞᱤ ᱠᱦᱚᱱ ᱢᱟᱱᱣᱟ ᱠᱤᱱ ᱡᱟᱱᱟᱢ ᱟᱠᱟᱱᱟ ᱯᱚᱨᱟᱭᱱᱤ ᱥᱟᱠᱟᱢ ᱪᱮᱛᱟᱱ ᱨᱮᱦᱚᱸ ᱩᱱᱩᱢᱚᱜ ᱠᱟᱱᱟ ᱠᱤᱱ ᱾ ᱚᱱᱟ ᱧᱮᱞᱛᱮ ᱪᱮᱬᱮ ᱠᱤᱱ ᱥᱤᱧ ᱧᱤᱫᱟᱹ ᱥᱮᱨᱢᱟ ᱨᱮ ᱢᱟᱰᱨᱟᱣ ᱟᱛᱮ ᱠᱤᱱ ᱨᱟᱜ ᱦᱚᱢᱚᱨ ᱟᱠᱟᱠᱤᱱ ᱛᱟᱦᱮᱸᱭᱮᱱᱟ᱾

    ᱴᱷᱟᱹᱠᱩᱨ ᱵᱚᱸᱜᱟ ᱠᱚ ᱫᱤᱥᱟᱹ ᱦᱮᱡᱽ ᱟᱫ ᱠᱚᱣᱟ ᱫᱚᱥᱟᱨᱛᱮ ᱫᱷᱟᱹᱨᱛᱤ ᱯᱩᱨᱤ ᱛᱮᱭᱟᱨ ᱞᱟᱹᱜᱤᱫ ᱠᱚ ᱠᱩᱨᱩᱢᱩᱴᱩ ᱠᱮᱫᱟ᱾ ᱵᱟᱝᱠᱷᱟᱱ ᱦᱟᱺᱥᱼᱦᱟᱺᱥᱞᱤ ᱨᱤᱱ ᱢᱟᱱᱣᱟ ᱦᱚᱯᱚᱱ ᱚᱠᱟᱨᱮᱠᱤᱱ ᱫᱚᱦᱚ ᱠᱤᱱᱟ᱾ ᱢᱮᱱᱠᱷᱟᱱ ᱫᱟᱜ ᱪᱮᱛᱟᱱ ᱨᱮ ᱦᱟᱥᱟ ᱪᱤᱠᱟᱹᱛᱮ ᱛᱤᱸᱜᱩᱱᱟ ᱴᱷᱟᱹᱠᱩᱨ ᱫᱮᱵᱟᱞᱚᱠᱚ ᱚᱱᱟ ᱦᱤᱛ ᱛᱮᱜᱮ ᱦᱚᱨᱚ ᱨᱟᱡᱽ ᱠᱚ ᱦᱚᱦᱚ ᱟᱫᱮᱭᱟ ᱟᱨ ᱥᱚᱱᱟ ᱥᱤᱠᱲᱤᱛᱮ ᱥᱮᱨᱢᱟ ᱥᱟᱞᱟᱜ ᱯᱩᱱ ᱠᱟᱴᱟ ᱠᱚ ᱛᱚᱞ ᱠᱮᱫᱮᱭᱟ᱾ ᱩᱱᱤ ᱦᱚᱨᱚ ᱨᱟᱡᱽ ᱪᱮᱛᱟᱱ ᱨᱮ ᱠᱟᱹᱨᱤ ᱱᱟᱜᱤᱱ ᱵᱤᱧ ᱠᱚ ᱯᱤᱴᱤ ᱠᱮᱫᱮᱭᱟ ᱟᱨ ᱟᱡ ᱪᱮᱛᱟᱱᱨᱮ ᱥᱚᱱᱟ ᱛᱷᱟᱹᱨᱤ ᱠᱚ ᱫᱚᱦᱚ ᱠᱮᱫᱟ᱾ ᱟᱫᱚ ᱦᱚᱦᱚ ᱟᱫᱮᱭᱟ ᱠᱚ ᱢᱟᱜᱟᱲ ᱛᱟᱭᱟᱱ, ᱟᱹᱰᱤ ᱨᱤᱠᱟᱹ ᱠᱟᱛᱮ ᱨᱮᱦᱚᱸ ᱢᱟᱜᱟᱲ ᱛᱟᱭᱟᱱ ᱯᱟᱛᱟᱞ ᱨᱮᱱᱟᱜ ᱦᱟᱥᱟ ᱥᱚᱱᱟ ᱛᱷᱟᱹᱨᱤ ᱪᱮᱛᱟᱱ ᱨᱮ ᱵᱟᱭ ᱨᱟᱠᱟᱵ ᱫᱟᱲᱮᱭᱟᱫᱟ᱾ ᱱᱚᱝᱠᱟ ᱜᱮ ᱢᱤᱫ ᱢᱤᱫᱛᱮ ᱤᱪᱟᱹᱜ ᱦᱟᱹᱠᱩ, ᱫᱷᱤᱨᱤ ᱠᱟᱛᱠᱚᱢ, ᱥᱳᱞᱮ ᱵᱚᱣᱟᱲ, ᱡᱚᱛᱚ ᱜᱮᱠᱚ ᱵᱤᱰᱟᱹᱣ ᱠᱮᱫ ᱠᱚᱣᱟ, ᱢᱮᱱᱠᱷᱟᱱ ᱚᱠᱚᱭ ᱦᱚᱸ ᱦᱟᱥᱟ ᱫᱚ ᱵᱟᱠᱚ ᱨᱟᱠᱟᱵ ᱫᱟᱲᱮᱭᱟᱫᱟ᱾ ᱢᱩᱪᱟᱹᱫ ᱨᱮᱫᱚ ᱞᱮᱸᱰᱮᱛ ᱨᱟᱡᱽ ᱯᱟᱛᱟᱞ ᱨᱮ ᱢᱮᱱᱟᱜ ᱦᱟᱥᱟᱨᱮ ᱜᱮᱨ ᱮᱱᱟᱭ ᱟᱨ ᱪᱩᱯᱤ ᱛᱮᱫ ᱫᱳ ᱥᱚᱱᱟ ᱛᱷᱟᱹᱨᱤ ᱪᱮᱛᱟᱱ ᱨᱮ ᱫᱚᱦᱚ ᱠᱮᱫ ᱛᱟᱭᱟᱭ, ᱱᱚᱝᱠᱟᱛᱮ ᱦᱟᱥᱟᱭ ᱵᱩᱨᱩᱡ ᱨᱟᱠᱟᱵ ᱠᱮᱫᱼᱟ᱾ ᱥᱤᱨᱡᱚᱱᱤᱭᱟ ᱫᱷᱟᱹᱨᱛᱤ ᱯᱩᱨᱤ᱾

ᱟᱹᱫ ᱠᱷᱚᱱ ᱢᱟᱹᱱᱢᱤ ᱥᱤᱨᱡᱚᱱ

ᱦᱤᱦᱤᱲᱤ ᱯᱤᱯᱤᱲᱤ ᱨᱮ ᱯᱤᱞᱪᱩ ᱦᱟᱲᱟᱢ ᱯᱤᱞᱪᱩ ᱵᱩᱰᱷᱤ ᱨᱤᱱ ᱮᱭᱟᱭ ᱠᱚᱲᱟ ᱮᱭᱟᱭ ᱠᱩᱲᱤ ᱠᱚ ᱛᱟᱦᱮᱸ ᱛᱟᱦᱮᱸ ᱛᱮ ᱟᱹᱰᱤ ᱫᱤᱱ ᱠᱚ ᱛᱟᱦᱮᱸ ᱮᱱᱟ᱾ ᱟᱨ ᱟᱹᱰᱤ ᱠᱚ ᱥᱟᱸᱜᱮᱭᱮᱱᱟ ᱠᱷᱟᱱ ᱜᱮ ᱯᱤᱞᱪᱩ ᱛᱤᱠᱤᱱ ᱦᱚᱯᱚᱱ ᱯᱟᱹᱨᱤᱥ ᱠᱤᱱ ᱦᱟᱹᱴᱤᱧ ᱟᱫ ᱠᱚᱣᱟ, ᱦᱟᱸᱥᱫᱟ, ᱢᱩᱨᱢᱩ, ᱠᱤᱥᱠᱩ, ᱦᱮᱢᱵᱨᱚᱢ, ᱢᱟᱨᱰᱤ, ᱥᱚᱨᱮᱱ ᱴᱩᱰᱩ ᱟᱨ ᱢᱤᱫ ᱯᱟᱹᱨᱤᱥ ᱨᱮᱫᱚ ᱮᱠᱟᱞ ᱜᱮ ᱟᱞᱚᱯᱮ ᱵᱟᱯᱞᱟᱜᱼᱟ᱾

ᱠᱷᱳᱡᱽ ᱠᱟᱢᱟᱱ ᱛᱮᱠᱚ ᱪᱟᱞᱟᱣ ᱮᱱᱟ ᱚᱸᱰᱮ ᱫᱚ ᱢᱟᱱᱣᱟ ᱠᱚ ᱟᱹᱰᱤ ᱵᱟᱹᱲᱤᱡ ᱠᱚ ᱠᱟᱹᱢᱤ ᱠᱮᱫᱼᱟ᱾ᱵᱟᱠᱚ ᱪᱤᱯᱤᱱᱟᱹᱣ ᱞᱮᱱᱟ ᱾ᱩᱱᱠᱩᱣᱟᱜ ᱚᱱᱠᱟᱱ ᱵᱮᱵᱟᱲᱤᱡ ᱧᱮᱞᱛᱮ ᱫᱦᱚᱨᱚᱢ ᱫᱚ ᱟᱹᱰᱤ ᱮᱫᱽᱨᱮ ᱮᱱᱟᱭ ᱾ ᱠᱷᱚᱡ ᱠᱮᱫ ᱠᱚᱣᱟᱭ ᱢᱟᱱᱣᱟ ᱫᱮᱞᱟ ᱦᱤᱡᱩᱜ ᱯᱮ ᱾ ᱫᱷᱳᱨᱚᱢ ᱟᱜ ᱠᱟᱛᱷᱟ ᱵᱟᱠᱚ ᱟᱸᱡᱚᱢ ᱞᱮᱫᱟ᱾ ᱫᱷᱟᱥᱟᱣ ᱜᱤᱫᱤ ᱮ ᱜᱚᱴᱟ ᱠᱮᱫᱼᱟ᱾ ᱵᱨᱟᱭᱟ ᱢᱟᱱᱣᱟ ᱦᱚᱦᱚ ᱠᱟᱛᱮ ᱠᱤᱱᱟᱭ ᱟᱹᱵᱤᱱ ᱫᱚ ᱦᱟᱨᱟᱛᱟ ᱵᱩᱨᱩ ᱫᱷᱟᱸᱫᱷᱮᱨ ᱨᱮ ᱵᱚᱞᱚ ᱠᱚᱜ ᱵᱤᱱ ᱟᱨ ᱠᱚ ᱢᱟᱱᱶᱟ ᱫᱳᱧ ᱜᱚᱡᱽ ᱪᱟᱵᱟ ᱠᱚᱣᱟ᱾ ᱩᱱᱠᱤᱱ ᱫᱚ ᱫᱷᱳᱨᱚᱢ ᱟᱜ ᱠᱟᱛᱷᱟ ᱠᱤᱱ ᱟᱸᱡᱚᱢ ᱠᱮᱫᱼᱟ᱾ ᱚᱱᱟ ᱛᱟᱭᱚᱢ ᱫᱷᱳᱨᱚᱢ ᱮᱭᱟᱭ ᱥᱤᱧ ᱮᱭᱟᱭ ᱧᱤᱫᱟᱹ ᱥᱮᱸᱜᱮᱞ ᱫᱟᱜ ᱮ ᱡᱟᱹᱲᱤ ᱠᱮᱫᱼᱟ᱾ ᱡᱚᱛᱚ ᱠᱚ ᱜᱚᱡᱽ ᱪᱟᱵᱟ ᱮᱱᱟ ᱾ ᱛᱟᱭᱚᱢ ᱩᱱᱠᱤᱱ ᱥᱚᱱᱚᱛ ᱡᱩᱨᱤ ᱢᱟᱱᱶᱟ ᱫᱚ ᱦᱟᱨᱟᱛᱟ ᱵᱩᱨᱩ ᱠᱷᱚᱱ ᱫᱚᱠᱤᱱ ᱚᱰᱚᱠ ᱞᱮᱱᱟ᱾ ᱟᱨ ᱚᱱᱟ ᱦᱟᱨᱟᱛᱟ ᱵᱩᱨᱩ ᱯᱷᱮᱰ (ᱦᱟᱨᱟᱛᱟ ᱵᱩᱨᱩ ᱤᱨᱟᱹᱱ ᱫᱤᱥᱚᱢ) ᱨᱮᱜᱮ ᱠᱤᱱ ᱚᱲᱟᱜ ᱫᱩᱣᱟᱹᱨ ᱟᱱᱟ᱾

    ᱜᱤᱫᱽᱨᱟᱹᱼᱯᱤᱫᱽᱨᱟᱹ ᱟᱱᱟᱠᱤᱱ, ᱛᱟᱭᱚᱢ ᱫᱚᱠᱚ ᱥᱟᱸᱜᱮ ᱤᱫᱤᱭᱮᱱᱟ ᱾ ᱠᱷᱟᱱ ᱜᱮ ᱦᱟᱨᱟᱛᱟ ᱠᱦᱚᱱ ᱥᱟᱥᱟᱝ ᱵᱮᱰᱟ ᱛᱮᱠᱚ ᱪᱟᱞᱟᱣ ᱮᱱᱟ ᱾ ᱚᱸᱰᱮ ᱟᱹᱰᱤ ᱫᱤᱱ ᱠᱚ ᱛᱟᱦᱮᱸ ᱮᱱᱟ ᱾ ᱟᱨ ᱠᱚ ᱡᱟᱹᱛ ᱫᱚᱦᱚᱲᱟᱭ ᱮᱱᱟ ᱾ ᱯᱤᱞᱪᱩ ᱦᱟᱲᱟᱢ ᱯᱤᱞᱪᱩ ᱵᱩᱫᱷᱤ ᱨᱤᱱ ᱦᱚᱯᱚᱱ ᱠᱚ ᱡᱟᱦᱟᱸ ᱮᱭᱟᱭ ᱜᱚᱴᱟᱝ ᱯᱟᱹᱨᱤᱥ ᱠᱤᱱ ᱦᱟᱹᱴᱤᱧ ᱟᱫ ᱠᱚ ᱛᱟᱦᱮᱸᱫ᱾ ᱚᱱᱟ ᱵᱷᱮᱜᱮᱫ ᱱᱩᱠᱤᱱ ᱫᱚ ᱟᱨᱦᱚᱸ ᱢᱚᱬᱮ ᱜᱚᱴᱟᱝ ᱯᱟᱹᱨᱤᱥ ᱠᱤᱱ ᱦᱟᱹᱴᱤᱧ ᱵᱟᱹᱲᱛᱤ ᱟᱫ ᱠᱚᱣᱟ ᱚᱱᱟ ᱠᱚᱫᱚ ᱵᱟᱥᱠᱮ, ᱵᱮᱥᱨᱟ, ᱯᱟᱹᱣᱨᱤᱭᱟ, ᱪᱚᱬᱮ ᱟᱨ ᱰᱚᱴᱠᱟ᱾

    ᱟᱨ ᱠᱤᱱ ᱢᱮᱛᱟᱫ ᱠᱚᱣᱟ ᱢᱤᱫ ᱯᱟᱹᱨᱤᱥ ᱨᱮᱫᱚ ᱟᱞᱚᱯᱮ ᱵᱟᱯᱞᱟᱜᱼᱟ᱾ ᱱᱚᱝᱠᱟ ᱛᱮ ᱡᱚᱛᱚ ᱨᱮ ᱜᱮᱞᱵᱟᱨ ᱜᱚᱴᱟᱝ ᱯᱟᱹᱨᱤᱥ ᱦᱩᱭ ᱮᱱᱟ ᱾ ᱚᱱᱟ ᱯᱟᱹᱨᱤᱥ ᱠᱚᱫᱚ ᱦᱟᱸᱥᱫᱟ, ᱢᱩᱨᱢᱩ, ᱠᱤᱥᱠᱩ, ᱢᱟᱨᱰᱤ, ᱦᱮᱢᱵᱨᱚᱢ, ᱥᱚᱨᱮᱱ, ᱴᱩᱰᱩ, ᱵᱟᱥᱠᱮ, ᱵᱮᱥᱨᱟ, ᱯᱟᱶᱨᱤᱭᱟ,ᱪᱚᱬᱮ ᱟᱨ ᱰᱚᱴᱠᱟ᱾

    ᱢᱟᱨᱮ ᱦᱟᱯᱲᱟᱢ ᱠᱚ ᱟᱯᱷᱨᱤᱠᱟᱹ ᱨᱮᱱᱟᱜ “ᱵᱷᱩᱢᱚᱫᱷᱚ ᱥᱟᱜᱟᱨ” ᱨᱮᱱᱟᱜ ᱟᱲᱮ ᱯᱟᱥᱮ ᱨᱮᱠᱚ ᱡᱟᱱᱟᱢ ᱵᱟᱹᱰ ᱞᱮᱱᱟ᱾ ᱚᱱᱟ ᱛᱟᱭᱚᱢ ᱜᱚᱲᱚᱢ ᱛᱮᱫ ᱟᱹᱫᱽ ᱨᱮᱭᱟᱜ ᱚᱱᱟ ᱵᱩᱨᱩ ᱜᱮ ᱱᱟᱦᱟᱜ ᱫᱚ ᱦᱮᱢᱟᱞ ᱵᱩᱨᱩ ᱵᱚ ᱢᱮᱛᱟᱜ ᱠᱟᱱᱟ ᱾ ᱟᱨ ᱟᱹᱫᱽ ᱨᱮᱭᱟᱜ ᱜᱟᱝ ᱱᱟᱹᱭ ᱟᱨ ᱥᱩᱲᱟᱹ ᱱᱟᱹᱭ ᱫᱚ “ᱥᱤᱱᱫᱷᱩ ᱢᱚᱥᱮᱯᱳᱴᱮᱢᱤᱭᱟ ᱥᱟᱜᱟᱨ” ᱟᱨ ᱜᱚᱝᱜᱟ ᱱᱟᱹᱭ ᱵᱚ ᱢᱮᱛᱟᱜ ᱠᱟᱱᱟ᱾ ᱚᱱᱟ ᱞᱮᱠᱟᱛᱮ ᱟᱵᱚ ᱦᱚᱸ ᱩᱱᱠᱩᱨᱮᱱ ᱜᱟᱬᱟ ᱠᱚ ᱠᱟᱱ ᱜᱮᱭᱟ ᱵᱚᱱ᱾ ᱱᱟᱦᱟᱜ ᱫᱚ ᱟᱹᱫᱽ ᱨᱮᱭᱟᱜ ᱫᱤᱥᱚᱢ ᱠᱚᱫᱚ ᱚᱱᱠᱟ ᱵᱟᱹᱱᱩᱜ ᱨᱮᱦᱚᱸ ᱠᱷᱮᱨᱣᱟᱲ ᱠᱚᱫᱚ ᱦᱟᱹᱴᱤᱧ ᱞᱮᱠᱟ ᱛᱮᱜᱮ ᱫᱤᱥᱚᱢ ᱫᱚᱵᱚᱱ ᱞᱟᱹᱭ ᱟᱹᱜᱩᱭᱮᱫ ᱜᱮᱭᱟ᱾

ᱡᱮᱞᱮᱠᱟᱺᱼ ᱫᱦᱟᱲ ᱢᱩᱞᱩᱜᱽ, ᱪᱟᱢᱯᱟᱲᱟ ᱢᱩᱞᱩᱠ, ᱥᱤᱞᱫᱟᱹ ᱛᱩᱝ ᱫᱤᱥᱚᱢ, ᱵᱷᱟᱴ ᱢᱩᱞᱩᱠ, ᱵᱷᱚᱸᱡᱽ ᱫᱤᱥᱚᱢ, ᱥᱤᱠᱟᱹᱨ ᱫᱤᱥᱚᱢ, ᱵᱟᱨᱣᱟ ᱫᱤᱥᱚᱢ, ᱯᱟᱛᱠᱚᱢ ᱫᱤᱥᱚᱢ, ᱤᱴᱟᱹ ᱫᱤᱥᱚᱢ, ᱯᱤᱲ ᱫᱤᱥᱚᱢ, ᱠᱩᱪᱩᱝ ᱫᱤᱥᱚᱢ, ᱦᱩᱰᱤᱝ ᱛᱩᱝ – ᱢᱟᱨᱟᱝ ᱛᱩᱝ, ᱥᱤᱧᱵᱷᱩᱢ, ᱢᱟᱱᱵᱷᱩᱢ ᱢᱟᱱ ᱫᱤᱥᱚᱢ, ᱜᱚᱡᱤᱭᱟᱹ ᱫᱤᱥᱚᱢ, ᱵᱟᱫᱚᱢ ᱫᱤᱥᱚᱢ, ᱠᱦᱚᱞᱟᱲ ᱢᱚᱛᱚᱜ ᱮᱢᱟᱱ ᱠᱚ ᱫᱤᱥᱚᱢ ᱛᱮᱵᱚ ᱵᱟᱰᱭ ᱵᱤᱠᱟᱹᱜ ᱠᱟᱱᱟ᱾ writer :- Govind mandi

Sanwta sanes
Premchand murmu