ᱟᱢ ᱫᱚ ᱚᱠᱚᱭ
ᱩᱯᱨᱩᱢ ᱵᱟᱝᱠᱷᱟᱱ ᱠᱚ ᱢᱮᱛᱟᱢ,
ᱟᱢ ᱫᱚ ᱚᱠᱚᱭ?
ᱯᱷᱩᱨᱜᱟᱹᱞ ᱫᱤᱥᱚᱢ ᱨᱮ ᱟᱹᱫᱤᱢ,
ᱟᱢᱫᱚ ᱟᱹᱭᱫᱟᱹᱨᱤᱢ ᱠᱚᱚᱠᱭ᱿
ᱩᱯᱨᱩᱢ ᱵᱟᱝᱠᱷᱟᱱ ᱦᱟᱯᱯᱮᱱ,
ᱢᱤᱫ ᱫᱤᱱ ᱦᱤᱞᱚᱜ ᱮᱢ ᱟᱫᱚᱜ᱾
ᱡᱟᱱᱟᱢ ᱨᱚᱲ ᱟᱲᱟᱝ ᱛᱟᱦᱮᱱ ᱛᱩᱞᱩᱡ,
ᱡᱟᱱᱟᱢ ᱨᱚᱲ ᱛᱮᱢ ᱟᱫᱚᱜ᱿
ᱱᱟᱦᱟᱜ ᱡᱩᱜ ᱨᱤᱱ ᱦᱚᱯᱚᱱ ᱠᱚ ᱧᱮᱞᱛᱮ,
ᱤᱧᱫᱩᱧ ᱵᱩᱡᱷᱟᱣ ᱟᱹᱰᱤ ᱫᱟᱭᱟ᱾
ᱩᱨᱩᱢ ᱩᱯᱨᱩᱢ ᱢᱟᱞᱚᱴᱚᱜ ᱠᱟᱱ,
ᱡᱟᱦᱟᱸ ᱛᱟᱦᱮᱸ ᱠᱟᱱᱟ ᱥᱮᱫᱟᱭ᱿
ᱠᱩᱲᱤ ᱠᱚᱣᱟᱜ ᱠᱷᱳᱫᱟ ᱪᱤᱱᱦᱟᱸ,
ᱠᱚᱲᱟ ᱠᱚᱣᱟᱜ ᱛᱤᱨᱮ ᱥᱤᱠᱷᱟᱹ᱾
ᱦᱟᱯᱲᱟᱢ ᱠᱚᱣᱟᱜ ᱢᱟᱞᱚᱴᱚᱜ ᱠᱟᱱ,
ᱟᱢ ᱫᱚ ᱚᱠᱚᱭᱮ ᱮᱢᱟᱢᱟ ᱤᱠᱟᱹ᱿
ᱫᱤᱥᱚᱢ ᱨᱮᱫᱚ ᱢᱮᱱᱟᱜ ᱠᱚᱣᱟ,
ᱟᱭᱢᱟ ᱡᱟᱹᱛᱤ ᱟᱭᱢᱟ ᱦᱚᱲ᱾
ᱩᱱᱠᱩ ᱢᱩᱫᱽ ᱨᱮ ᱩᱯᱨᱩᱢ ᱛᱟᱠᱚ,
ᱵᱷᱮᱜᱟᱨᱼᱵᱷᱮᱜᱟᱨ ᱠᱚ ᱨᱚᱲ᱿
ᱫᱟᱹᱲᱷᱤ ᱫᱟᱲᱭᱟ ᱧᱮᱞ ᱛᱮ ᱯᱚᱸᱡᱟᱵᱤ,
ᱵᱟᱫᱨᱚ ᱞᱩᱝᱜᱤ ᱧᱮᱞ ᱛᱮ ᱢᱩᱥᱟᱞᱢᱟᱱ᱾
ᱵᱟᱱᱟᱢ ᱛᱤᱨᱭᱚ ᱥᱟᱠᱣᱟ ᱚᱨᱚᱝ,
ᱛᱩᱢᱫᱟᱜ ᱴᱟᱢᱟᱠ ᱢᱤᱫ ᱛᱟᱲ᱾
ᱵᱤᱦᱟᱨ ᱵᱮᱝᱜᱚᱞ ᱩᱰᱤᱥᱟ ᱟᱥᱟᱢ,
ᱟᱢᱟᱜ ᱩᱯᱨᱩᱢ ᱢᱟᱦᱞᱮ, ᱢᱩᱸᱰᱟᱹ ᱥᱟᱱᱛᱟᱲ᱾
1 comment:
ᱟᱹᱰᱤ ᱥᱚᱨᱮᱥ ᱜᱟᱱ ᱟᱠᱟᱱᱟ
Post a Comment