ᱫᱷᱟᱹᱨᱛᱤ ᱯᱩᱨᱤ ᱥᱤᱨᱡᱚᱱ
ᱦᱟᱯᱲᱟᱢ ᱠᱚᱣᱟᱜ ᱠᱟᱛᱷᱟ ᱞᱮᱠᱟᱛᱮ ᱟᱹᱜᱤᱞ ᱨᱮᱱᱟᱜ ᱯᱟᱹᱦᱤᱞ ᱡᱩᱜ ᱨᱮᱫᱚ ᱱᱚᱣᱟ ᱫᱷᱟᱨᱛᱤ ᱯᱩᱨᱤ ᱨᱮᱫᱚ ᱡᱤᱵᱽ ᱡᱤᱭᱟᱹᱞᱤ ᱪᱤᱞᱤᱦᱚᱸ ᱵᱟᱠᱚ ᱛᱟᱦᱮᱸ ᱠᱟᱱᱟ᱾ ᱩᱱ ᱡᱚᱦᱚᱜ ᱫᱚ ᱜᱚᱴᱟ ᱯᱟᱲᱟ ᱠᱟᱬᱟᱝ ᱠᱩᱲ ᱪᱟᱝ ᱧᱩᱛᱩᱛ ᱜᱮ ᱛᱟᱦᱮᱸ ᱠᱟᱱᱟ᱾ ᱚᱱᱟ ᱠᱟᱬᱟᱝ ᱧᱩᱛᱟᱛ ᱦᱚᱭ ᱠᱦᱚᱞ ᱨᱮ ᱢᱤᱫ ᱜᱚᱴᱟᱝ ᱥᱟᱵᱟᱜᱤ ᱫᱤᱞ ᱫᱟᱲᱮ ᱛᱟᱦᱮᱸ ᱠᱟᱱᱟ᱾ᱱᱩᱭ ᱫᱤᱞ ᱫᱟᱲᱮ ᱱᱚᱰᱮ ᱟᱡᱟᱜ ᱡᱟᱦᱟᱸᱨᱟ ᱩᱫᱩᱜ ᱞᱟᱹᱜᱤᱫ ᱟᱹᱰᱤ ᱟᱸᱪ ᱯᱟᱸᱪ ᱠᱟᱛᱮ ᱠᱩᱨᱩᱢᱩᱴᱩ ᱟᱴᱮ ᱟᱡᱟᱜ ᱫᱟᱲᱮ ᱵᱟᱦᱟ ᱵᱦᱩᱴᱟᱹᱜ ᱮᱱᱟ᱾
ᱟᱰᱚ ᱚᱱᱟ ᱫᱟᱲᱮ ᱱᱚᱝᱠᱟ ᱠᱩᱨᱩ ᱢᱩᱴᱩ ᱵᱟᱲᱟ ᱠᱟᱛᱮ ᱞᱟᱲᱟᱣ ᱮᱱᱟᱭ᱾ ᱞᱟᱲᱟᱣ ᱞᱟᱲᱟᱣ –ᱞᱟᱲᱟᱣ ᱛᱮ ᱡᱚᱠᱷᱚᱱ ᱥᱮᱸᱜᱮᱞ ᱞᱮᱠᱟᱭ ᱞᱚᱞᱚ ᱤᱫᱤ ᱮᱱᱟ᱾ ᱚᱱᱟ ᱟᱡᱟᱜ ᱮᱞᱟᱝ ᱫᱟᱲᱮ ᱥᱟᱱᱟᱢ ᱯᱟᱠᱟᱲ ᱛᱟᱨᱥᱮ ᱮᱱᱟ ᱟᱨ ᱚᱱᱟ ᱦᱚᱭ ᱜᱚᱴᱟ ᱯᱟᱲᱟ ᱫᱟᱹᱲ ᱟᱹᱪᱩᱨ ᱮᱱᱟ ᱾ ᱟᱰᱚ ᱚᱱᱟ ᱜᱷᱩᱨᱱᱤ ᱵᱟᱹᱨᱰᱩ ᱞᱮᱠᱟ ᱫᱩᱨᱼᱫᱩᱨᱟᱹᱣ ᱟᱹᱪᱩᱨ ᱮᱱᱟ ᱢᱮᱱᱮᱠ “ᱥᱤᱥᱤᱨ ᱡᱚᱱᱤᱡ” ᱾
ᱟᱰᱚ ᱩᱱᱤ ᱵᱚᱸᱜᱟ ᱥᱩᱱ ᱟᱨ ᱧᱚᱛ ᱨᱮᱜᱮ ᱠᱤᱱ ᱛᱦᱤᱨ ᱛᱦᱟᱨ ᱡᱟᱹᱯᱤᱫ ᱚᱪᱮᱛ ᱨᱮᱜᱮ ᱛᱟᱦᱮᱸ ᱟᱠᱟᱭ ᱛᱟᱦᱮᱸ ᱮᱱᱟ᱾ ᱢᱤᱫ ᱫᱤᱱ ᱫᱚ ᱟᱪᱠᱟ ᱜᱮ ᱢᱚᱱᱮ ᱨᱤᱪ ᱨᱟᱹᱥᱠᱟᱹ ᱛᱮ ᱫᱦᱟᱹᱨᱛᱤ ᱯᱩᱨᱤ ᱵᱮᱱᱟᱣ ᱞᱟᱹᱜᱤᱫ ᱠᱩᱠᱢᱩ ᱞᱮᱠᱟ ᱯᱩᱞᱩᱜ ᱯᱩᱞᱩᱜ ᱟᱫᱷᱟ ᱵᱷᱟᱣ ᱢᱤᱫᱴᱟᱝ ᱟᱹᱰᱤ ᱢᱟᱨᱟᱝ ᱦᱟᱦᱟᱲᱟ ᱫᱩᱨᱤᱵ ᱮ ᱧᱮᱞ ᱧᱟᱢ ᱠᱮᱫᱼᱟᱭ᱾ ᱟᱫᱚ ᱛᱚᱢ ᱠᱦᱚᱱᱮ ᱚᱝ ᱜᱳᱫ ᱮᱱᱟ ᱾ ᱠᱷᱟᱱ ᱜᱮ ᱠᱦᱟᱱ ᱜᱮ ᱱᱚᱝᱠᱟ ᱫᱟᱲᱮ ᱦᱮᱡ ᱟᱫᱮᱭᱟ ᱟᱡ ᱦᱚᱸ ᱟᱡ ᱵᱟᱭ ᱧᱮᱞ ᱧᱟᱢ ᱞᱮᱱᱟ ᱾ ᱚᱱᱟ ᱫᱟᱲᱮ ᱫᱚ ᱵᱟᱨ ᱦᱟᱹᱴᱤᱧ ᱨᱮ ᱦᱟᱴᱤᱧ ᱮᱱᱟ ᱾ ᱢᱤᱫ ᱫᱚ ᱢᱟᱨᱟᱝ ᱵᱩᱨᱩ ᱟᱨ ᱵᱟᱨ ᱫᱚ ᱡᱟᱦᱮᱨ ᱟᱭᱳ ᱾ ᱱᱩᱠᱤᱱ ᱵᱟᱱᱟᱨ ᱵᱟᱸᱜᱟ ᱢᱟᱨᱟᱝ ᱵᱩᱨᱩ ᱟᱨ ᱡᱟᱦᱮᱨ ᱟᱭᱳ ᱦᱚᱭ ᱫᱟᱲᱮ ᱛᱮ ᱥᱮᱨᱢᱟ ᱯᱩᱨᱤ ᱨᱮ ᱵᱟᱝ ᱧᱮᱧᱮᱞ ᱞᱮᱠᱟ ᱜᱦᱩᱨ ᱜᱦᱩᱣᱟᱹᱣ ᱟᱹᱪᱩᱨ ᱮᱱᱟ ᱠᱤᱱ᱾ ᱥᱮᱨᱢᱟ ᱨᱮ ᱨᱤᱢᱤᱞ ᱫᱟᱜ ᱡᱮᱢᱚᱱ ᱛᱟᱯᱟᱠᱤᱡ ᱞᱮᱱ ᱠᱦᱟᱱ ᱞᱟᱦᱟᱛᱮ ᱵᱤᱡᱽᱞᱤ ᱢᱟᱨᱥᱟᱞ ᱧᱮᱞ ᱧᱟᱢᱚᱜᱼᱟ᱾ ᱦᱩᱰᱩᱨ ᱥᱟᱰᱮ ᱟᱲᱟᱟᱝ ᱥᱟᱰᱮᱭᱟ, ᱚᱱᱟ ᱛᱟᱭᱚᱢ ᱫᱟᱜ ᱮ ᱡᱟᱹᱲᱤᱭᱟᱹ᱾ ᱚᱱᱠᱟ ᱱᱩᱠᱤᱱ ᱵᱚᱸᱜᱟ ᱮᱛᱚᱢ ᱟᱨ ᱠᱚᱭᱮᱸ ᱠᱦᱚᱱᱟᱜ ᱟᱹᱪᱩᱨ ᱟᱹᱪᱩᱨ ᱡᱚᱦᱚᱜ ᱛᱟᱹᱠᱤᱡ ᱛᱟᱯᱟᱠᱤᱡ ᱞᱮᱱᱟᱠᱤᱱ᱾ ᱟᱨ ᱵᱤᱡᱽᱞᱤ ᱵᱤᱞᱤᱫ ᱵᱤᱞᱤᱫ ᱟᱨ ᱢᱟᱨᱥᱟᱞ ᱟᱨ ᱦᱩᱰᱩᱨ ᱥᱟᱰᱮ ᱞᱮᱱᱟ᱾ ᱚᱱᱟ ᱵᱤᱡᱽᱞᱤ ᱵᱤᱞᱤᱫ ᱵᱟᱹᱨᱰᱩ ᱦᱩᱰᱩᱨ ᱥᱟᱰᱮ ᱛᱟᱞᱟ ᱠᱦᱚᱱ ᱜᱮ ᱥᱤᱧ ᱪᱟᱸᱫᱳ, ᱫᱷᱟᱨᱛᱤ ᱯᱩᱨᱤ, ᱧᱤᱸᱫᱟ ᱪᱟᱸᱫᱳ, ᱤᱯᱤᱞ ᱮᱸᱜᱮᱞ ᱮᱢᱟᱱ ᱠᱚ ᱚᱢᱚᱱ ᱮᱱᱟᱠᱚ ᱾ ᱟᱫᱚ ᱟᱯᱟᱱ ᱟᱹᱯᱤᱱ ᱡᱟᱭᱜᱟᱨᱮ ᱛᱟᱦᱮᱸ ᱠᱟᱛᱮ ᱟᱹᱪᱩᱨ ᱟᱠᱟᱜᱮ ᱢᱮᱱᱟᱜ ᱠᱚᱣᱟ᱾ ᱟᱫᱷᱟᱱ ᱠᱚᱣᱟᱜ ᱥᱮᱸᱜᱮᱞ ᱞᱚᱞᱚ ᱫᱚ ᱨᱟᱲᱮᱡᱽ ᱟᱠᱟᱱᱟ᱾ ᱚᱱᱟᱛᱮ ᱥᱤᱝ ᱟᱨ ᱧᱤᱫᱟᱹ ᱷᱩᱭᱩᱜ ᱠᱟᱱᱟ᱾
ᱥᱤᱨᱡᱚᱱ ᱮᱱᱟ ᱥᱚᱨᱚᱜᱽᱯᱩᱨᱤ , ᱢᱚᱧᱪᱚ ᱯᱩᱨᱤ, ᱫᱷᱟᱨᱛᱤ ᱯᱩᱨᱤ, ᱟᱨ ᱯᱟᱛᱟᱞ ᱯᱩᱨᱤ᱾
ᱫᱚᱥᱟᱨ ᱫᱷᱟᱹᱨᱛᱤ ᱯᱩᱨᱤ ᱥᱤᱨᱡᱚᱱ
ᱥᱮᱫᱟᱭ ᱟᱹᱜᱤᱞ ᱦᱟᱯᱲᱟᱢ ᱠᱚᱨᱮᱱ ᱵᱤᱨᱫᱟᱹᱞᱤ ᱠᱚᱣᱟᱜ ᱠᱟᱛᱷᱟ ᱞᱮᱠᱟᱛᱮ ᱪᱮ ᱩᱭᱦᱟᱹᱨ ᱵᱷᱟᱵᱤᱛ ᱛᱮ ᱯᱟᱹᱦᱤᱞ ᱢᱮᱱᱛᱮ ᱫᱚ ᱟᱹᱫᱽ ᱨᱮ ᱡᱟᱦᱟᱸ ᱫᱷᱟᱹᱨᱴᱤ ᱛᱟᱦᱮᱸ ᱠᱟᱱᱟ ᱚᱱᱟᱫᱚ ᱵᱟᱹᱱᱩᱜ ᱟᱠᱟᱫᱟ᱾ ᱢᱮᱱ ᱫᱚ ᱞᱟᱦᱟ ᱛᱮᱭᱟᱜ ᱡᱟᱦᱟᱸ ᱫᱷᱟᱹᱨᱛᱤ ᱯᱩᱨᱤ ᱛᱟᱦᱮᱸ ᱠᱟᱱᱟ ᱚᱱᱟᱨᱮ ᱫᱟᱜ ᱵᱟᱝ ᱛᱟᱦᱮᱸ ᱠᱟᱱᱟ᱾ ᱫᱟᱜ ᱵᱟᱹᱱᱩᱜ ᱠᱷᱟᱹᱛᱤᱨ ᱫᱮᱵᱽᱼᱫᱮᱵᱟᱞᱳᱠ ᱠᱚ ᱫᱷᱟᱹᱨᱛᱤ ᱨᱮ ᱠᱩᱧ ᱞᱟ ᱠᱚ ᱮᱦᱚᱵ ᱠᱮᱫᱟ᱾ᱚᱱᱟᱨᱮ ᱟᱴᱟᱞ ᱟᱴᱟᱞ ᱫᱦᱤᱨᱤ ᱠᱚ ᱞᱟ ᱯᱟᱨᱚᱢ ᱠᱮᱫᱼᱟ᱾ ᱢᱮᱱᱠᱷᱟᱱ ᱫᱟᱜ ᱜᱮ ᱵᱟᱝ ᱥᱮᱛᱮᱧ ᱞᱮᱱᱟ, ᱵᱚᱸᱜᱟ ᱠᱚ ᱪᱟᱶᱨᱤᱭᱟ ᱢᱮᱞᱟ ᱨᱮ ᱵᱤᱪᱟᱹᱨ ᱜᱚᱴᱟ ᱠᱮᱫᱟ ᱢᱟᱨᱟᱝ ᱵᱩᱨᱩᱣᱟᱜ ᱵᱟᱹᱨᱵᱷᱤ ᱦᱟᱯᱟ ᱚᱱᱟ ᱪᱟᱹᱴᱟᱹᱱᱤ ᱟᱴᱟᱞ ᱫᱷᱤᱨᱤ ᱨᱮ ᱡᱚᱥ ᱠᱟᱛᱮ ᱜᱚᱡᱚᱢᱚᱛᱤ ᱦᱟᱛᱤ ᱠᱚ ᱞᱮᱵᱮᱫ ᱚᱪᱚ ᱠᱮᱫᱮᱭᱟ᱾ ᱚᱱᱟ ᱟᱴᱟᱞ ᱫᱷᱤᱨᱤ ᱵᱦᱩᱜᱟᱹᱜ ᱠᱟᱛᱮ ᱫᱷᱟᱹᱨᱴᱤ ᱵᱷᱤᱛᱨᱩᱤ ᱠᱦᱚᱱ ᱫᱟᱜ ᱵᱦᱚᱠ ᱵᱷᱳᱠᱟᱣ ᱚᱲᱚᱠᱮᱱᱟ, ᱚᱱᱟᱞᱮᱠᱟᱛᱮ ᱫᱦᱟᱹᱨᱛᱤ ᱫᱚ ᱡᱚᱞᱟ ᱯᱩᱨᱤ ᱞᱮᱱᱟ᱾
ᱡᱚᱞᱷᱚᱱ ᱦᱟᱺᱥ ᱦᱟᱺᱥᱞᱤ ᱵᱤᱞᱤ ᱠᱦᱚᱱ ᱢᱟᱱᱣᱟ ᱠᱤᱱ ᱡᱟᱱᱟᱢ ᱟᱠᱟᱱᱟ ᱯᱚᱨᱟᱭᱱᱤ ᱥᱟᱠᱟᱢ ᱪᱮᱛᱟᱱ ᱨᱮᱦᱚᱸ ᱩᱱᱩᱢᱚᱜ ᱞᱟᱹᱜᱤᱫᱚᱜ ᱠᱟᱱᱟ ᱠᱤᱱ᱾ ᱚᱱᱟ ᱧᱮᱞᱛᱮ ᱪᱮᱬᱮ ᱠᱤᱱ ᱥᱤᱧᱼᱧᱤᱫᱟᱹ ᱥᱮᱨᱢᱟ ᱨᱮ ᱢᱟᱰᱨᱟᱣ ᱟᱛᱮ ᱨᱟᱜ ᱟᱠᱟᱠᱤᱱ ᱛᱟᱦᱮᱸᱭᱮᱱᱟ᱾
ᱴᱷᱟᱹᱠᱩᱨ ᱵᱚᱸᱜᱟᱠᱚ ᱫᱤᱥᱟᱹ ᱷᱮᱡᱽ ᱟᱫ ᱠᱚᱣᱟ ᱫᱚᱥᱟᱨ ᱛᱮ ᱫᱷᱟᱹᱨᱛᱤ ᱯᱩᱨᱤ ᱵᱮᱱᱟᱣ ᱛᱮᱭᱟᱨ ᱞᱟᱹᱜᱤᱫ ᱠᱚ ᱠᱩᱨᱩᱢᱩᱴᱩ ᱠᱮᱫᱟ᱾ ᱵᱟᱝᱠᱷᱟᱱ ᱦᱟᱺᱥ ᱦᱟᱺᱥᱞᱤ ᱨᱮᱱ ᱢᱟᱱᱣᱟ ᱦᱚᱯᱚᱱ ᱚᱠᱟᱨᱮᱠᱤᱱ ᱫᱚᱦᱚ ᱠᱤᱱᱟ ᱾ ᱢᱮᱱᱠᱷᱟᱱ ᱫᱟᱜ ᱪᱮᱛᱟᱱ ᱨᱮ ᱦᱟᱥᱟ ᱪᱮᱠᱟᱹᱛᱮ ᱛᱤᱸᱜᱩᱱᱟ ᱴᱷᱟᱹᱠᱩᱨ ᱫᱮᱵᱟᱞᱚᱠᱚ ᱚᱱᱟ ᱦᱤᱛ ᱛᱮᱜᱮ ᱦᱚᱨᱚ ᱨᱟᱡᱽ ᱠᱚ ᱦᱚᱦᱚ ᱟᱫᱮᱭᱟ ᱟᱨ ᱠᱚ ᱥᱚᱱᱟ ᱥᱤᱠᱲᱤᱴᱮ ᱥᱮᱨᱢᱟ ᱥᱟᱞᱟᱜ ᱯᱩᱱ ᱠᱟᱴᱟ ᱠᱚ ᱛᱚᱞ ᱠᱮᱫᱮᱭᱟ ᱾ ᱩᱱᱤ ᱦᱚᱨᱚ ᱨᱟᱡᱽ ᱪᱮᱛᱟᱱ ᱨᱮ ᱠᱟᱹᱨᱤ ᱱᱟᱹᱜᱤᱱ ᱠᱚ ᱵᱤᱧ ᱠᱚ ᱯᱤᱴᱤ ᱠᱮᱫᱮᱭᱟ ᱟᱨ ᱟᱡ ᱪᱮᱛᱟᱱᱨᱮ ᱥᱚᱱᱟ ᱛᱷᱟᱹᱨᱤ ᱠᱚ ᱫᱚᱦᱚ ᱠᱮᱫᱟ᱾ ᱟᱫᱚ ᱦᱚᱦᱚ ᱟᱫᱮᱭᱟ ᱠᱚ ᱢᱟᱜᱟᱲ ᱛᱟᱭᱟᱱ ᱯᱟᱛᱟᱞ ᱨᱮᱱᱟᱜ ᱦᱟᱥᱟ ᱥᱚᱱᱟ ᱛᱷᱟᱹᱨᱤ ᱪᱮᱛᱟᱱ ᱨᱮ ᱵᱟᱭ ᱨᱟᱠᱟᱵ ᱫᱟᱲᱮᱭᱟᱫᱟ᱾ ᱱᱚᱝᱠᱟ ᱢᱤᱫ ᱢᱤᱫᱛᱮ ᱤᱪᱟᱹᱜ ᱦᱟᱹᱠᱩ, ᱫᱷᱤᱨᱤ ᱠᱟᱴᱠᱚᱢ, ᱥᱚᱞᱮ ᱵᱚᱣᱟᱲ, ᱡᱚᱛᱚ ᱜᱮᱠᱚ ᱵᱤᱰᱟᱹᱣ ᱠᱮᱫ ᱠᱚᱣᱟ ᱢᱮᱱᱠᱷᱟᱱ ᱚᱠᱚᱭ ᱜᱮ ᱦᱟᱥᱟ ᱫᱚ ᱵᱟᱠᱚ ᱨᱟᱠᱟᱵ ᱫᱟᱲᱮᱭᱟᱫᱟ᱾ ᱢᱩᱪᱟᱹᱫ ᱨᱮᱫᱚ ᱞᱮᱸᱰᱮᱛ ᱨᱟᱡᱽ ᱯᱟᱛᱟᱞ ᱨᱮ ᱢᱮᱱᱟᱜ ᱦᱟᱥᱟ ᱫᱚ ᱜᱮᱨ ᱮᱱᱟᱭ ᱟᱨ ᱪᱩᱯᱤᱛᱮᱫ ᱫᱚ ᱥᱚᱱᱟ ᱛᱷᱟᱹᱨᱤ ᱪᱮᱛᱟᱱ ᱨᱮ ᱫᱚᱦᱚ ᱠᱮᱫ ᱛᱟᱭᱟᱭ, ᱱᱚᱝᱠᱟᱛᱮ ᱦᱟᱥᱟᱭ ᱵᱩᱨᱩᱡ ᱨᱟᱠᱟᱵ ᱠᱮᱫᱼᱟ᱾ ᱥᱤᱨᱡᱚᱱᱮᱱᱟ ᱫᱷᱟᱹᱨᱛᱤ ᱯᱩᱨᱤ᱾
ᱟᱹᱫ ᱠᱷᱚᱱ ᱢᱟᱹᱱᱢᱤ ᱥᱤᱨᱡᱚᱱ
ᱦᱤᱦᱤᱲᱤ ᱯᱤᱯᱤᱲᱤ ᱨᱮ ᱯᱤᱞᱪᱩ ᱵᱩᱫᱷᱤ ᱨᱤᱱ ᱮᱭᱟᱭ ᱠᱚᱲᱟ ᱟᱨ ᱮᱭᱟᱭ ᱠᱩᱲᱤ ᱠᱚ ᱛᱟᱦᱮᱸ ᱛᱟᱦᱮᱸ ᱛᱮ ᱟᱹᱰᱤ ᱫᱤᱱ ᱠᱚ ᱛᱟᱦᱮᱸᱭᱮᱱᱟ᱾ ᱟᱨ ᱟᱹᱰᱤ ᱠᱚ ᱥᱟᱸᱜᱮᱭᱮᱱᱟ ᱠᱷᱟᱱ ᱯᱤᱞᱪᱩ ᱛᱤᱠᱤᱱ ᱦᱚᱯᱚᱱ ᱠᱚ ᱯᱟᱹᱨᱤᱥ ᱠᱤᱱ ᱦᱟᱹᱴᱤᱧ ᱟᱫ ᱠᱚᱣᱟ, ᱦᱟᱸᱥᱫᱟ, ᱢᱩᱨᱢᱩ, ᱠᱤᱥᱠᱩ, ᱦᱮᱢᱵᱨᱚᱢ, ᱢᱟᱹᱨᱰᱤ, ᱥᱚᱨᱮᱱ, ᱴᱩᱰᱩ ᱟᱨ ᱢᱤᱫ ᱯᱟᱹᱨᱤᱥ ᱨᱮᱫᱚ ᱮᱠᱟᱞ ᱟᱞᱚᱯᱮ ᱵᱟᱯᱞᱟᱜᱼᱟ᱾ ᱠᱦᱚᱡᱽ ᱠᱟᱢᱟᱱ ᱛᱮᱠᱚ ᱪᱟᱞᱟᱣ ᱮᱱᱟ ᱚᱸᱰᱮ ᱫᱚ ᱢᱟᱱᱣᱟ ᱠᱚ ᱟᱹᱰᱤ ᱵᱟᱹᱲᱤᱡ ᱠᱚ ᱠᱟᱹᱢᱤ ᱠᱮᱫᱼᱟ᱾ ᱵᱟᱠᱚ ᱪᱤᱯᱤᱱᱟᱹᱣ ᱞᱮᱱᱟ᱾ ᱩᱱᱠᱩᱣᱟᱜ ᱵᱮᱵᱟᱹᱲᱤᱡ ᱧᱮᱞᱛᱮ ᱫᱦᱚᱨᱚᱢ ᱫᱚ ᱟᱹᱰᱤ ᱮᱫᱽᱨᱮ ᱮᱱᱟᱭ᱾ ᱠᱦᱚᱡ ᱠᱮᱫ ᱠᱚᱣᱟᱭ ᱫᱮᱞᱟ ᱦᱤᱡᱩᱜ ᱯᱮ ᱾ ᱢᱮᱱᱠᱷᱟᱱ ᱫᱦᱚᱨᱚᱢ ᱟᱜ ᱠᱟᱛᱷᱟ ᱵᱟᱝ ᱠᱚ ᱟᱸᱡᱚᱢ ᱞᱮᱫᱟ ᱾ ᱚᱱᱟ ᱛᱮ ᱫᱷᱟᱹᱨᱛᱤ ᱯᱩᱨᱤ ᱫᱚ ᱫᱷᱟᱥᱣᱟ ᱜᱤᱰᱤ ᱠᱟᱜ ᱮ ᱜᱚᱴᱟ ᱠᱮᱫᱟ᱾ ᱵᱟᱨᱭᱟ ᱢᱟᱱᱣᱟ ᱦᱚᱦᱚ ᱠᱟᱛᱮ ᱢᱮᱛᱟᱫ ᱠᱤᱱᱟᱹᱭ ᱟᱵᱤᱱ ᱫᱚ ᱦᱟᱨᱟᱛᱟ ᱵᱩᱨᱩ ᱫᱷᱟᱸᱫᱷᱮᱨ ᱨᱮ ᱵᱚᱞᱚ ᱠᱚᱜ ᱵᱤᱱ, ᱟᱨ ᱠᱚ ᱢᱟᱱᱣᱟ ᱫᱚᱧ ᱜᱚᱡᱽ ᱜᱤᱰᱤ ᱪᱟᱵᱟ ᱠᱚᱣᱟ᱾ ᱩᱱᱠᱤᱱ ᱫᱚ ᱫᱦᱚᱨᱚᱢ ᱟᱜ ᱠᱟᱛᱷᱟ ᱠᱤᱱ ᱟᱸᱡᱚᱢ ᱠᱮᱫᱼᱟ᱾ ᱚᱱᱟ ᱛᱟᱭᱚᱢ ᱫᱦᱚᱨᱚᱢ ᱮᱭᱟᱭ ᱥᱤᱧ ᱮᱭᱟᱭ ᱧᱤᱫᱟᱹ ᱥᱮᱸᱜᱮᱞ ᱫᱟᱜ ᱮ ᱡᱟᱹᱲᱤ ᱠᱮᱫᱼᱟ᱾ ᱡᱚᱛᱚ ᱠᱚ ᱜᱚᱡᱽ ᱪᱟᱵᱟ ᱮᱱᱟ᱾ᱛᱟᱭᱚᱢ ᱩᱱᱠᱤᱱ ᱥᱚᱱᱚᱛ ᱡᱩᱨᱤ ᱢᱟᱱᱣᱟ ᱫᱚ ᱦᱟᱨᱟᱛᱟ ᱵᱩᱨᱩ ᱠᱷᱚᱱ ᱫᱚᱠᱤᱱ ᱚᱰᱚᱠ ᱮᱱᱟ᱾ᱟᱨ ᱚᱱᱟ ᱦᱟᱨᱟᱛᱟ ᱵᱩᱨᱩ ᱯᱷᱮᱰ (ᱦᱟᱨᱟᱛᱟ ᱵᱩᱨᱩ ᱤᱨᱟᱱ ᱫᱤᱥᱚᱢ) ᱨᱮᱜᱮ ᱠᱤᱱ ᱚᱲᱟᱜ ᱫᱩᱣᱟᱹᱨ ᱟᱱᱟ᱾
ᱜᱤᱫᱽᱨᱟᱹ ᱯᱤᱫᱽᱨᱟᱹ ᱟᱱᱟᱠᱤᱱ ᱛᱟᱭᱚᱢ ᱫᱚᱠᱚ ᱥᱟᱸᱜᱮ ᱤᱫᱤᱭᱮᱱᱟ ᱠᱦᱟᱱ ᱜᱮ ᱦᱟᱨᱟᱛᱟ ᱵᱩᱨᱩ ᱫᱤᱥᱚᱢ ᱠᱷᱚᱱ ᱥᱟᱥᱟᱝ ᱵᱮᱰᱟ ᱛᱮᱠᱚ ᱪᱟᱞᱟᱣ ᱮᱱᱟ᱾ ᱚᱸᱰᱮ ᱟᱹᱰᱤ ᱫᱤᱱ ᱠᱚ ᱛᱟᱦᱮᱸ ᱮᱱᱟ ᱟᱨ ᱠᱚ ᱡᱟᱹᱛ ᱫᱚᱦᱲᱟᱭᱮᱱᱟ᱾ ᱯᱤᱞᱪᱩ ᱦᱟᱲᱟᱢ ᱯᱤᱞᱪᱩ ᱵᱩᱰᱷᱤ ᱨᱤᱱ ᱦᱚᱯᱚᱱ ᱠᱚ ᱡᱟᱦᱟᱸ ᱮᱭᱟᱭ ᱜᱚᱴᱟᱝ ᱯᱟᱹᱨᱤᱥ ᱠᱤᱱ ᱦᱟᱹᱴᱤᱧ ᱟᱫ ᱠᱚ ᱛᱟᱦᱮᱸᱫ᱾ ᱚᱱᱟ ᱵᱷᱮᱜᱮᱫ ᱱᱩᱠᱤᱱ ᱫᱚ ᱟᱨᱦᱚᱸ ᱢᱚᱬᱮ ᱜᱚᱴᱟᱝ ᱯᱟᱹᱨᱤᱥ ᱠᱤᱱ ᱦᱟᱹᱴᱤᱧ ᱵᱟᱹᱲᱛᱤ ᱟᱫ ᱠᱚᱣᱟ᱾ ᱚᱱᱟ ᱠᱚᱫᱚ ᱵᱟᱥᱠᱮ, ᱵᱮᱥᱨᱟ, ᱯᱟᱹᱣᱨᱤᱭᱟᱹ, ᱪᱚᱬᱮ ᱟᱨ ᱰᱚᱴᱠᱟ᱾
ᱢᱟᱨᱮ ᱦᱟᱯᱲᱟᱢ ᱠᱚ ᱟᱯᱷᱨᱤᱠᱟ ᱨᱮᱱᱟᱜ “ᱵᱦᱩᱢᱚᱫᱷᱚ ᱥᱟᱜᱟᱨ” ᱨᱮᱱᱟᱜ ᱟᱲᱮ ᱯᱟᱲᱮ ᱨᱮᱠᱚ ᱡᱟᱱᱟᱢ ᱵᱟᱹᱰ ᱞᱮᱱᱟ᱾ ᱚᱱᱟ ᱛᱟᱭᱚᱢ ᱜᱚᱲᱚᱢ ᱛᱮᱫ ᱟᱹᱫᱽ ᱨᱮᱭᱟᱜ ᱚᱱᱟ ᱵᱩᱨᱩ ᱜᱮ ᱱᱟᱦᱟᱜ ᱫᱚ ᱦᱮᱢᱟᱞ ᱵᱩᱨᱩ ᱵᱚ ᱢᱮᱛᱟᱜ ᱠᱟᱱᱟ᱾ ᱟᱨ ᱟᱹᱫᱽ ᱨᱮᱭᱟᱜ ᱜᱚᱝᱱᱟᱹᱭ ᱥᱩᱲᱟᱹ ᱱᱟᱹᱭ ᱫᱚ “ᱥᱤᱸᱫᱷᱩ ᱢᱚᱥᱮᱯᱳᱴᱮᱢᱤᱭᱟ ᱥᱟᱜᱚᱨ” ᱟᱨ ᱜᱚᱝᱜᱟ ᱱᱟᱹᱭ ᱵᱚ ᱢᱮᱛᱟᱜ ᱠᱟᱱᱟ ᱾ ᱚᱱᱟ ᱞᱮᱠᱟᱛᱮ ᱟᱵᱚ ᱦᱚᱸ ᱩᱱᱠᱤᱱ ᱨᱤᱱ ᱜᱟᱬᱟ ᱠᱟᱱ ᱜᱮᱭᱟᱵᱚᱱ ᱾ ᱱᱟᱦᱟᱜ ᱫᱚ ᱟᱹᱫᱽ ᱨᱮᱭᱟᱜ ᱫᱤᱥᱚᱢ ᱠᱚᱫᱚ ᱚᱱᱠᱟ ᱵᱟᱹᱱᱩᱜ ᱨᱮᱦᱚᱸ ᱠᱷᱮᱨᱣᱟᱞ ᱠᱚᱫᱚ ᱯᱟᱹᱦᱤᱞ ᱦᱟᱹᱴᱤᱧ ᱞᱮᱠᱟ ᱛᱮᱜᱮ ᱫᱤᱥᱚᱢ ᱫᱚᱵᱚᱱ ᱞᱟᱹᱭ ᱟᱹᱜᱩᱭᱮᱫ ᱜᱮᱭᱟ ᱵᱚᱱ ᱾ ᱡᱮᱞᱮᱠᱟᱺᱼ ᱫᱷᱟᱲ ᱢᱩᱞᱩᱜ, ᱫᱟᱢᱯᱟᱲᱟ ᱢᱩᱞᱩᱜ, ᱥᱤᱞᱫᱟᱹ ᱛᱩᱝ ᱫᱤᱥᱚᱢ, ᱵᱷᱟᱴ ᱢᱩᱞᱩᱜ, ᱵᱷᱚᱸᱡᱽ ᱫᱤᱥᱚᱢ, ᱥᱤᱠᱟᱹᱨ ᱫᱤᱥᱚᱢ, ᱵᱟᱨᱣᱟ ᱫᱤᱥᱚᱢ, ᱯᱟᱹᱛᱠᱚᱢ ᱫᱤᱥᱚᱢ, ᱤᱴᱟᱹ ᱫᱤᱥᱚᱢ, ᱯᱤᱲ ᱫᱤᱥᱚᱢ, ᱠᱩᱪᱩᱝ ᱫᱤᱥᱚᱢ, ᱦᱩᱰᱤᱝ ᱛᱩᱝ, ᱢᱟᱨᱟᱝ ᱛᱩᱝ, ᱥᱤᱝᱵᱷᱩᱢ, ᱢᱟᱱᱵᱷᱩᱢ, ᱢᱟᱱ ᱫᱤᱥᱚᱢ, ᱜᱚᱡᱤᱭᱟᱹ ᱫᱤᱥᱚᱢ, ᱵᱟᱫᱟᱢ ᱫᱤᱥᱚᱢ, ᱠᱷᱚᱞᱚᱲ ᱢᱚᱛᱚᱜ, ᱮᱢᱟᱱ ᱠᱚ ᱫᱤᱥᱚᱢ ᱛᱮᱵᱚ ᱵᱤᱠᱟᱹᱣᱚᱜ ᱠᱟᱱᱟ᱾
ᱥᱟᱶᱛᱟ ᱥᱟᱬᱮᱥ ᱯᱚᱛᱚᱵ
No comments:
Post a Comment