ᱡᱟᱦᱮᱨ ᱛᱷᱟᱱ ᱫᱚ ᱠᱷᱮᱨᱣᱟᱲ ᱥᱟᱨᱱᱟ ᱫᱷᱚᱨᱚᱢ ᱠᱚᱣᱟᱜ ᱢᱟᱨᱟᱝ ᱵᱚᱸᱜᱟ ᱵᱩᱨᱩ ᱛᱷᱟᱯᱚᱱ ᱡᱟᱦᱮᱨ ᱛᱷᱟᱱ ᱠᱟᱱᱟ᱾ ᱡᱟᱦᱮᱨ ᱛᱷᱟᱱ ᱫᱚ ᱟᱹᱛᱩ ᱠᱩᱞᱦᱤ ᱢᱩᱪᱟᱹᱫ ᱠᱷᱚᱱ ᱠᱚᱸᱭᱮ ᱥᱮᱫ ᱨᱮ ᱛᱟᱦᱮᱸᱱᱟ ᱾ ᱡᱟᱦᱮᱨ ᱨᱮᱫᱚ ᱥᱟᱺᱜᱮ ᱥᱟᱨᱡᱚᱢ ᱫᱟᱨᱮ , ᱛᱤᱨᱤᱞ ᱫᱟᱨᱮ ᱢᱟᱛᱠᱚᱢ ᱫᱟᱨᱮ ᱮᱢᱟᱱ ᱫᱟᱨᱮᱛᱮ ᱜᱟᱡᱟᱲ ᱛᱟᱦᱮᱸᱱᱟ ᱥᱟᱱᱛᱟᱲ ᱡᱟᱹᱛᱤ ᱨᱤᱱ ᱢᱩᱲᱩᱫ ᱵᱚᱸᱜᱟ ᱫᱚ ᱢᱟᱨᱟᱝ ᱵᱩᱨᱩ, ᱡᱟᱦᱮᱨ ᱮᱨᱟ ᱟᱨ ᱫᱷᱚᱨᱚᱢ ᱾
ᱥᱟᱨᱡᱚᱢ ᱫᱟᱨᱮ ᱨᱮᱱᱟᱝ ᱜᱩᱱ ᱫᱚ ᱦᱟᱦᱟᱲᱟ ᱜᱮᱭᱟ ᱡᱮ ᱞᱮᱠᱟ ᱵᱟᱦᱟ ᱨᱚᱦᱚᱲ ᱠᱚᱜ ᱨᱮᱦᱚᱸ ᱨᱩᱯ ᱫᱚ ᱵᱟᱭ ᱵᱚᱫᱚᱞᱚᱜᱼᱟ᱾ ᱧᱮᱞ ᱡᱚᱝ ᱦᱚᱸ ᱥᱟᱢᱟᱱᱚᱢ ᱡᱤᱱᱤᱠ ᱞᱤᱯᱤᱨ ᱾ ᱞᱚᱲᱮ ᱪᱮ ᱫᱷᱩᱲᱟᱹ ᱟᱛᱟᱨ ᱞᱮᱱᱠᱷᱟᱱ ᱥᱚ ᱛᱮ ᱫᱮᱵ ᱜᱩᱱ ᱠᱚ ᱟᱬᱜᱚᱱᱟ ᱟᱨ ᱴᱟᱢᱟᱠ ᱵᱟᱱᱟᱢ, ᱵᱷᱩᱣᱟᱹᱝ ᱮᱢᱟᱱ ᱠᱚᱨᱮ ᱫᱷᱩᱬᱟᱹ ᱞᱟᱜᱟᱣ ᱞᱮᱱᱠᱷᱟᱱ ᱟᱹᱰᱤ ᱥᱟᱺᱜᱤᱧ ᱱᱤᱴᱷᱩᱨ ᱥᱟᱰᱮ ᱛᱟᱨᱠᱚ ᱛᱟᱠᱮᱨ ᱪᱟᱞᱟᱜᱼᱟ ᱟᱨ ᱥᱟᱨ ᱥᱟᱹᱜᱩᱱ ᱠᱟᱹᱢᱤ ᱠᱚ ᱨᱮ ᱦᱚᱸ ᱥᱟᱨᱡᱚᱢ ᱥᱟᱠᱟᱢ ᱜᱮᱵᱚᱱ ᱵᱮᱵᱷᱟᱨᱼᱟ᱾ ᱟᱨ ᱚᱱᱮ ᱥᱮᱛᱟᱜ ᱠᱷᱟᱱᱜᱮ ᱥᱟᱨᱡᱚᱢ ᱫᱟᱹᱛᱟᱹᱸᱤ᱾
ᱡᱟᱦᱮᱨ ᱨᱮᱫᱚ ᱢᱟᱨᱟᱝ ᱵᱩᱨᱩ, ᱡᱟᱦᱮᱨ ᱮᱨᱟ, ᱢᱚᱬᱮ ᱠᱚ ᱛᱩᱨᱩᱭ ᱠᱚ , ᱥᱮᱸᱫᱽᱨᱟ ᱵᱚᱸᱜᱟ ᱟᱨ ᱦᱚᱸ ᱥᱤᱢᱟᱹ ᱥᱟᱲᱮ ᱵᱚᱸᱜᱟ ᱠᱚᱠᱚ ᱨᱟᱠᱟᱵ ᱠᱚᱣᱟ ᱾ ᱵᱚᱸᱜᱟ ᱫᱚ ᱵᱟᱦᱟ , ᱢᱟᱜ ᱢᱚᱬᱮ , ᱮᱨᱚᱜ ᱢᱟᱣᱟ ᱡᱚᱢ, ᱟᱹᱥᱟᱹᱲᱤᱭᱟᱹ ᱮᱢᱟᱱ ᱡᱚᱦᱚᱜ ᱵᱚᱱ ᱵᱚᱸᱜᱟᱭᱟ ᱾ ᱚᱱᱟᱛᱮᱱᱚᱣᱟ ᱡᱟᱦᱮᱨ ᱛᱷᱟᱱ ᱫᱚ ᱡᱟᱦᱮᱨ ᱴᱷᱟᱶ ᱦᱚᱸ ᱵᱚ ᱢᱮᱛᱟᱜᱼᱟ᱾
ᱡᱟᱦᱮᱨ ᱛᱟᱞᱟ ᱨᱮ ᱡᱩᱨᱤ ᱥᱟᱨᱡᱚᱢ ᱫᱟᱨᱮ ᱵᱩᱴᱟᱹᱨᱮ ᱢᱤᱫ ᱴᱟᱝ ᱡᱟᱦᱮᱨ ᱚᱲᱟᱜ ᱛᱟᱦᱮᱸᱱᱟ ᱾ ᱚᱱᱟ ᱚᱲᱟᱜ ᱨᱮᱫᱚ ᱡᱟᱦᱮᱨ ᱮᱨᱟ, ᱢᱟᱨᱟᱝ ᱵᱩᱨᱩ, ᱟᱨ ᱢᱚᱬᱮ ᱠᱚ ᱟᱨ ᱛᱩᱨᱩᱭ ᱠᱚ, ᱱᱩᱠᱩ ᱯᱮᱭᱟ ᱵᱚᱸᱜᱟ ᱠᱚ ᱛᱷᱟᱯᱚᱱ ᱠᱟᱠᱚᱣᱟ ᱟᱨ ᱚᱱᱟ ᱥᱩᱨ ᱥᱟᱨᱡᱚᱢ ᱫᱟᱨᱮ ᱨᱮᱫᱚ ᱥᱮᱸᱫᱽᱨᱟ ᱵᱚᱸᱜᱟ ᱠᱚ ᱛᱷᱟᱯᱚᱱ ᱠᱟᱭᱟ ᱾ ᱥᱮᱸᱫᱽᱨᱟ ᱵᱚᱸᱜᱟ ᱚᱲᱟᱜ ᱫᱚ ᱵᱟᱠᱚ ᱠᱟᱱᱛᱷᱼᱟ᱾ ᱫᱷᱤᱨᱤ ᱛᱮᱠᱚ ᱵᱮᱲ ᱟᱹᱪᱩᱨ ᱠᱟᱜᱼᱟ᱾ ᱡᱟᱦᱮᱨ ᱨᱮᱭᱟᱜ ᱮᱛᱚᱢ ᱯᱟᱦᱴᱟ ᱥᱮᱫ ᱨᱮ ᱢᱤᱫ ᱴᱟᱝ ᱜᱩᱞᱟᱺᱴ ᱥᱟᱺᱦᱤᱡ ᱚᱲᱟᱜ ᱛᱟᱦᱮᱸᱱᱟ ᱟᱨ ᱛᱟᱞᱟ ᱨᱮᱫᱚ ᱠᱷᱩᱱᱴᱤ ᱛᱟᱦᱮᱸᱱᱟ᱾ ᱱᱩᱭ ᱵᱚᱸᱜᱟ ᱫᱚ ᱥᱤᱸᱫᱩᱨ ᱫᱚ ᱵᱟᱠᱚ ᱴᱤᱰᱟᱹᱜ ᱟᱭᱟ᱾ ᱰᱷᱮᱨᱟ ᱞᱮᱠᱷᱟ ᱜᱩᱞ ᱜᱮᱠᱚ ᱥᱤᱸᱰᱩᱨ ᱟᱭᱟ ᱾ ᱡᱟᱦᱮᱨ ᱨᱮᱫᱚ ᱟᱹᱛᱷᱹᱣᱲᱤ ᱫᱚ ᱵᱟᱠᱚ ᱮᱱᱮᱡ ᱼᱟ᱾ ᱵᱟᱦᱟ ᱵᱚᱸᱜᱟ ᱟᱨ ᱢᱟᱜ ᱢᱚᱬᱮ ᱵᱚᱸᱜᱟ ᱡᱚᱦᱚᱜ ᱜᱮᱠᱚ ᱮᱱᱮᱡ ᱥᱮᱨᱮᱧᱟ᱾
ᱡᱟᱦᱮᱨ ᱛᱷᱟᱱ ᱨᱮᱫᱚ ᱢᱟᱱᱟᱣ ᱵᱟᱛᱟᱣ ᱠᱟᱛᱮᱪᱟᱞᱟᱜ ᱦᱩᱭᱩᱜ ᱼᱟ᱾ ᱵᱟᱝᱠᱷᱟᱱ ᱟᱹᱰᱤ ᱜᱚᱴᱟᱝ ᱱᱟᱬᱟ ᱯᱤᱲᱟᱹ ᱱᱟᱭᱠᱮ ᱥᱟᱶᱛᱮ ᱟᱹᱛᱩ ᱦᱚᱲ ᱠᱚ ᱧᱟᱢᱟ᱾
ᱡᱟᱦᱮᱨ ᱛᱟᱞᱟᱛᱮ ᱱᱟᱦᱮᱞ, ᱟᱬᱜᱚᱢ ᱡᱚᱲᱟᱣ ᱠᱟᱛᱮ ᱞᱟᱜᱟ ᱯᱟᱨᱚᱢ ᱫᱚ ᱢᱟᱱᱟ ᱜᱮᱭᱟ᱾ ᱪᱷᱩᱣᱟᱺᱛ ᱟᱠᱟᱱ ᱠᱩᱲᱤ ᱦᱚᱯᱚᱱ ᱡᱟᱦᱮᱨ ᱛᱟᱞᱟ ᱛᱮ ᱵᱚᱞᱚᱱ ᱦᱚᱸ ᱢᱟᱱᱟ ᱜᱮᱭᱟ᱾
ᱡᱟᱦᱮᱨ ᱫᱟᱨᱮ ᱨᱤᱱ ᱪᱮᱬᱮ ᱴᱩᱴᱤ ᱟᱨ ᱛᱩᱠᱟᱹ ᱨᱤᱱ ᱪᱮᱬᱮ ᱛᱤᱭᱩᱜ ᱦᱚᱸ ᱢᱟᱱᱟ ᱜᱮᱭᱟ ᱾ ᱡᱟᱦᱮᱨ ᱛᱷᱟᱱ ᱫᱚ ᱠᱷᱮᱨᱣᱟᱲ ᱦᱚᱲ ᱦᱚᱯᱚᱱᱟᱜ ᱢᱤᱫ ᱡᱢᱩᱤᱫ, ᱥᱩᱞᱩᱠ ᱥᱟᱹᱜᱟᱹᱭ ᱮ ᱟᱹᱜᱩᱭᱟ᱾ ᱚᱱᱟᱛᱮ ᱵᱚᱸᱜᱟ ᱵᱩᱨᱩ ᱡᱚᱦᱚᱜ ᱫᱚ ᱥᱟᱱᱟᱢ ᱦᱚᱲ ᱢᱤᱫ ᱴᱷᱮᱱ ᱥᱚᱲᱮ ᱫᱟᱠᱟ ᱤᱥᱤᱱ ᱠᱟᱛᱮ ᱥᱚᱢᱟᱱ ᱛᱮ ᱦᱟᱹᱴᱤᱧ ᱠᱟᱛᱮ ᱵᱚᱱ ᱡᱚᱢᱟ᱾ (ᱚᱠᱟ ᱦᱤᱞᱚᱜ ᱱᱚᱣᱟ ᱥᱚᱲᱮ ᱫᱟᱠᱟ ᱴᱩᱠᱩᱡ ᱨᱟᱹᱯᱩᱫ ᱪᱷᱤᱛᱤ ᱵᱤᱛᱤᱜᱼᱟ ᱤᱱᱟᱹ ᱦᱤᱞᱚᱜ ᱟᱵᱚ ᱦᱚᱸ ᱵᱚᱱ ᱟᱫᱚᱜᱼᱟ)᱾
ᱱᱚᱣᱟ ᱡᱟᱦᱮᱨ ᱛᱷᱟᱱ ᱨᱤᱱ ᱵᱚᱸᱜᱟ ᱵᱩᱨᱩ ᱠᱚ ᱥᱮᱵᱟ ᱫᱮᱵᱟ ᱞᱟᱹᱜᱤᱫ ᱱᱟᱭ ᱫᱤᱥᱟᱹ ᱟᱹᱱᱤᱡ ᱦᱚᱲᱮ ᱞᱟᱹᱠᱛᱤᱜᱼᱟ᱾ ᱡᱟᱦᱟᱸᱭ ᱵᱚ ᱢᱮᱛᱟᱭ ᱠᱟᱱᱟ ᱱᱟᱭᱠᱮ ᱵᱟᱵᱟ᱾
ᱥᱟᱶᱛᱟ ᱥᱟᱬᱮᱥ
No comments:
Post a Comment